Чурапчыга кулун тутар 15 — 16 күннэригэр Саха сирин күүстээх многоборецтара мустан, өрөспүүбүлүкэ чөмпүйүөнүн быһаарсыахтара. Түөрт бастыҥ атлет Дыгын оонньууларыгар путёвка тутуоҕа, суруйар ЯСИА.
Чемпионат 70 кг диэри уонна онтон үөһэ ыйааһыҥҥа эр дьоҥҥо, маны сэргэ дьахталларга буолуоҕа. Күрэхтэһиилэр Федотов аатынан элбэх хайысхалаах кииҥҥэ уонна физкультура, спорт институтун баазаларыгар ыытыллыахтара.
Спортсменнар национальнай ыстаныыларга, тутум эргииргэ, мас-рестлиҥҥа, оҕунан ытыыга, сүүрүүгэ, хапсаҕайга, ыараханы көтөҕүүгэ киирсиэхтэрэ. Хас биирдии көрүҥҥэ наҕараадаланыахтара.
