Дьокуускайга АГАТУ ат-спортивнай комплексыгар «Лена» үөрэтэр-уопуттуур манеж арылынна. Манна ат кулуубун дьарыктара, университет устудьуоннарын практикалара, инбэлиит оҕолор реабилитациялара ыытыллыаҕа, суруйар СИА.
Манеж сылы эргиччи үлэлиэҕэ. Күн аайы үс ат үлэҕэ тахсыаҕа, үөрэх тэрилтэтигэр барыта сэттэ ат баар. Кинилэр ортолоругар Саха сирин тоҕус төгүллээх чемпиона Малдьаҕар баар. Ат 160 см үөһэни ылар, бу спорт маастардарын нуорматыгар сөп түбэһэр.
Эбийиэк үлэҕэ киирэн, оҕолорго иппотерапия сылы эргиччи ыытыллыаҕа, урукку өттүгэр сылаас эрэ кэмҥэ бу дьарык буолара. Бэлиэтээн эттэххэ, устудьуоннар 2019 сыллаахха иппотерапияҕа Россия президенин гранын уонна 2021 сыллаахха «Россия ыччатын» гранын ылбыттара. Онон 200 оҕо ат көмөтүнэн эмтэммитэ.
«Биһиги комплекспытыгар элбэх талааннаах оҕо дьарыктанар. Өрөспүүбүлүкэ саҥа хамаандатын тэрийиэхпит норуоттар ардыларынааҕы күрэхтэһиилэргэ кыттарга. Универсиадаҕа кыттар хамаанда эмиэ тэриллиэҕэ. Сылаас манеж өрөспүүбүлүкэҕэ ат спорда сайдыытыгар тирэх буолуоҕа дии саныыбын», — диэн ат спордун федерациятын толорооччу дириэктэрэ Татьяна Копылова эттэ.
Хаартыска: Андрей Сорокин, СИА
