Норуот маастарын күнүн үгэскэ кубулуйбут национальнай таҥастаах сэлэлии хаамыынан бэлиэтээтилэр. Быйыл Дьокуускай киин уулуссатынан 1700 киһи хаамта, оройуоннартан, Дьокуускайтан, Жатайтан.
Күнүс 12.00 чааска Карл Маркс сквериттэн саҕалаан сэлэлии хаамыы саҕаланна. Саха сирин норуотун маастардара, устудьуоннар, национальнай-культурнай түмсүүлэр бэрэстэбиитэллэрэ, культура тэрилтэлэрин кэлэктииптэрэ Орджоникидзе болуоссатыгар диэри хааман тиийдилэр.
«Биһиги Муома улууһун Сааһыырыттан кэлэ сылдьабыт. Мин баайыынан уонна тигиинэн дьарыктанабын. Элбэх мааны тигиим дойдубар хаалла. Мин 16 сиэннээхпин, барыларын национальнай таҥаһынан хааччыйабын. Бу биһиги норуоппут олоҕор, өбүгэлэрбитигэр ытыктабыл бэлиэтэ. Бэйэм таҥаспын тигиигэ икки сыл барда. Тохтобуллардаах үлэлээбитим. Суумкабын быйыл тигинним. Сэлэлии хаамыыга аан бастаан 2017 сыллаахха кыттыбытым, уолбун кытта. Маннык тэрээһиннэргэ Саха сиригэр төһөлөөх элбэх талааннаах дьон олорорун билэҕин, идея ылаҕын, кэрэнэн дуоһуйаҕын», — диэтэ Раиса Таркова.
Кулун тутар 4 — 6 күннэригэр «Якутия мастеровая» быыстапка-дьаарбаҥка, «Удьуор Уус ситимэ» маастардар династияларын быыстапката, «Өттүк симэҕэ» дьахтар киэргэлин тигиигэ профессиональнай маастарыстыбаҕа куонкурус, «Дэрбэки» хотугу аҕыйах ахсааннаах норуоттар бэргэһэлэрин оҥоруу, «Удьаа. Көҥкөлөй» маһы ыллатыыга тэрээһиннэр буолаллар.
Россияҕа Дьиэ кэргэн сылыгар «Всей семьей» бырайыак үлэлиир, саайта: всейсемьей.рф.
