Бу күннэргэ саха уолаттара, Дьааҥы улууһун Адыаччы нэһилиэгиттэн төрүттээх игирэ бырааттыылар Леонид уонна Спиридон Анисимовтар хаартыскалара Италия аатырбыт «Vogue Italia» сурунаалыгар уонна «The Guardian» интернет-порталга бэчээттэннилэр.
2016 сыллаахха Дьокуускайга «MAGNUM PHOTOS» норуоттар икки ардыларынааҕы аан дойдуттан 76 бастыҥ фотограф үлэлиир агенствотыттан аатырбыт хаартыскаҕа түһэрээччи Яков Соболь Саха сиригэр кэлэн баҕалаах дьону хаартыскаҕа түһэрэн барбыт. Кини бэйэтэ игирэ аҥара буолан, ордук игирэлэри интэриэһиргиир эбит.
Европа бэчээтин уорганнара саха ыччаттарыгар тоҕо маннык улахан болҕомтону уурдулар? Бу туһунан билээри мин Спиридон Анисимовы анаан булан кэпсэттим.
— Бу хаартыска аан дойду устун «күүлэйдээбитэ» балтараа сыл буолла. Сүрүннээн Англия Лондоныгар уонна Голландия куораттарыгар улахан быыстапкаларга хаста да турдулар. Аатырбыт фотограф Якоб Соболь хаартыскаҕа түһэрэр дьоруойдарын көрдүүрүн уонна ордук болҕомтотун игирэлэргэ уурарын истэн, табаарыспыт киниэхэ баран түһэрбитигэр сүбэлээбитэ. Фотограф син балачча өр, биир чааһы быһа биһигини кытта үлэлээбитэ. Кини биһиэхэ ГУЛАГ лааҕырдарын туһунан уста сылдьарын кэпсээбитэ. Дьааҥыга анаан бараары сылдьарын онно билбиппит. Биһиги хос-хос эһэбит Ставропольтан төрүттээх нуучча киһитэ сыылкаҕа кэлэн, Дьааҥыга ГУЛАГ лааҕырыгар сылдьыбыт эбит. Ону кэлин интэриэһиргээн билбиппит. Онон Якоб Соболь биһиги төрүппүтүн-ууспутун интэриэһиргиирбитигэр эмиэ олугу уурбута диэхпитин сөп, — диэн кэпсиир Спиридон.
Уолаттар 2013 сылтан Дьокуускайга олорон үөрэнэллэр, үлэлииллэр. Игирэ бырааттыы Анисимовтары хаартыскаҕа түһэрэн баран Якоб Соболь маннык суруйбут:
— Мин эмиэ игирэ аҥара буолан дуу, бу уолаттар бэйэ-бэйэлэригэр сыһыаннарын, хайдах курдук бэйэ-бэйэлэрин өйөһөллөрүн ис дууһабыттан ылынным. Бу хаартыска инникилээх. Хайаан да дорҕоонноох «тыаһы» таһаарыаҕа.
Аатырбыт фотограф эппитинии, игирэ Анисимовтар хаартыскалара бүгүҥҥү күҥҥэ сурунаалтан сурунаалга, интернет-таһаарыыларга былдьаһыгынан барар буолла. Хаартыскалар араас быыстапкаларга кытта бэйэлэрин бочуоттаах миэстэлэрин булаллар.
«The Guardian» интернет-порталга уолаттар хаартыскаларын «Близнецы самого холодного города» диэн ааттаан таһаарбыттар. Бу үлэ «2016 сыл бастыҥ хаартыскалара» диэн рейтиҥҥэ бастыҥнар ахсааннарыгар киирбит.
