17 Тохсунньу 17.01
  • -48°
  • $ 73,82
  • 83,32

Чурапчылар биир дойдулаахтарын Санкт-Петербург куоракка кэриэстээтилэр

10:20, 09 июня 2016
Текст:

Чурапчы улууһун делегацията бэс ыйын 6 күнүгэр Санкт-Петербург куоракка ыһыах ыһыытын кэмигэр Ленинградскай уобаласка уонна киин куоратыгар көмүллүбүт биллиилээх биир дойдулаахтарыгар кэриэстэбил мүнүүтэтин анаатылар. 


Хатылы нэһилиэгин баһылыга Ульяна Атласова, ССРС уонна СӨ култууратын туйгуна Мария Иустинова, СӨ физическэй култууратын туйгуна Любовь Барашкова Ленинград уобалаһын Синявино куоратыгар сэриигэ өлбүттэр бииргэ көмүллүбүт сирдэригэр сырыттылар. Манна саха буойуна, Чурапчы улууһуттан төрүттээх Егор Дмитриевич Доҕордуурап көмүс уҥуоҕа харалла сытар.

Саха буойунун аата өйдөбүнньүк билиитэҕэ суруллубутун бөһүөлэк дьаһалтатын баһылыга Екатерина Макштутис көрдөрдө уонна сахаларга анаан-минээн кэлбиттэригэр махтанна. «Биһиги Улуу сэриигэ тыыннарын толук уурбут дьоммут аатын үйэтитиигэ олус элбэх үлэни ыытабыт. Бу историческай суолталаах уҥуоҕу куруук көрө-истэ, харыстыы сылдьабыт. Эһиги биһиэхэ кэлэ сылдьыбыккытыгар, биир дойдулаахтаргытын умнубаккытыгар махтанабыт», — диэтэ кини.

Саха сирин делегацията Чурапчы буорун уҥуохха куттулар. Егор Дмитриевич аймаҕа Любовь Барашкова анаан алаадьы астаан илдьибитин уурда. Ульяна Атласова буойуттары үйэтитии төрөөбүт төрүт сирдэригэр эмиэ ыытылларын кэпсээтэ. Ол кэннэ олохтоохторго махтаннылар, баһылыкка чороон, кинигэ уонна сахалыы ытарҕа бэлэхтээтилэр.

Бу сырыы түмүгүнэн, бырааттыылар уҥуохтарыгар Егор Доҕордуурап бартырыатын ыйыырга дуогабардастылар.

Салгыы делегация Синявскайдааҕы үрдэлгэ баар Албан аат аллеятыгар буойун сахаларга анаммыт билиитэҕэ сибэкки уурда. Бу күн Санкт-Петербург Смоленскайдааҕы кылабыыһатыгар сылдьан, саха суругун-бичигин төрүттээччи, улуу биир дойдулаахтара Семен Новгородов көмүллэ сытар сиригэр сырыттылар.

IMAG4285

0
0
17 января 17.01
  • -48°
  • $ 73,82
  • 83,32