Чурапчы сэлиэнньэтин гаастааһын үлэтэ саҕаланна. Бырайыак «2020-2025 сылларга тыа сирин территорияларын биир кэлим сайдыыта» судаарыстыбаннай бырагыраама чэрчитинэн олоххо киириэҕэ.
«Билиҥҥи туругунан гаас турбата ааһар суолун хаартан ыраастаатылар. 2,5 км иэннээх турбалары аҕаллылар. Былаан быһыытынан 421 дьиэ гааска холбонуохтаах. Үлэ 2021 сыл балаҕан ыйын 1 күнүгэр түмүктэниэхтээх», — диэн тыа хаһайыстыбатын министиэристибэтин тутууга дириэксийэтин салайааччыта Кирилл Местников иһитиннэрэр. Гаас турбатын устата 25 килэмиэтир. Эбийиэк сыаната 117 мөлүйүөн солкуобай.
2020 сылга Чурапчы оройуонугар аҕыс улахан бырайыак олоххо киириэхтээх. Ол иһигэр Ыһыах буолар сирин оҥоруу, Аҕа дойду Улуу сэриитин бэтэрээннэригэр пааматынньыгы чөлүгэр түһэрии, спортивнай былаһаакканы тутуу. Килээҥки уонна Туора-Күөл нэһилиэктэригэр оскуола-саадтар тутуллуохтаахтар.
Судаарыстыбаннай бырагыраама чэрчитинэн 2020 сылга Горнай Бэрдьигэстээҕэр, Мэҥэ Хаҥалас Бүтэйдээҕэр уонна Чурапчыга гаас турбалара тардыллыахтара.
Санатан эттэххэ, бэрэсидьиэн Владимир Путин 2019 сыл ахсынньытыгар тыа сирин олоҕун таһымын үрдэтэр соругу туруорбута. Судаарыстыбаннай бырагырааманы 2019 сыл ыам ыйыгар бигэргэппиттэрэ. 2020-2025 сылларга бырагыраамаҕа 2,3 триллион солкуобай көрүллүбүтэ.
