«Чолбон» сурунаал эрэдээксийэтэ Нам улууһун «Отуу уота» айар холбоһукка ыам ыйын 20 күнүгэр ыалдьыттаата. Онно Саха Өрөспүүбүлүкэтин Суруйааччыларын союһун бэрэссэдээтэлэ, саха норуодунай бэйиэтэ Иван Мигалкин уонна «Саха сирэ» хаһыат «Саха ыала» сыһыарыытын кэрэспэдьиэнэ, прозаик Надежда Егорова ыҥырыллан сырыттылар.
Ыҥырыылаах ыалдьыттары аан бастаан, Нам улууһунааҕы П.И. Сивцев аатынан кыраайы үөрэтэр музей балаҕаныгар көрүстүлэр. «Чолбон» сурунаал сүрүн эрэдээктэрэ Данил Макеев билиҥҥи уустук кэмҥэ уран тылы сөбүлээччи ааптардар бэртээхэй айымньыларын «Чолбон» сурунаалга уонна «Сэмсэ» сыһыарыыга бэчээттэтэн ааҕааччыларын үөрдэ сылдьалларын иһин махтанна уонна кинигэ бэлэх туттартаата. Салгыы сурунаал үлэһиттэрэ «Отуу уота» айар холбоһук кыттыылаахтарыгар бэйэлэрин айар үлэлэрин туһунан кэпсээтилэр, инники былааннарын кытта билиһиннэрдилэр, «Чолбон» сурунаалга суруттаралларыгар ыҥырдылар уонна кинилэр ыйытыыларыгар толору эпиэттэри биэрдилэр. Оттон олохтоох ааптардар саҥа хоһооннорун ааҕан иһитиннэрдилэр.
«Отуу уотун» салайааччыта Александр Дунаев кинилэр ыҥырыыларын ылынан Дьокуускайтан кэлбит суруйааччы ыалдьыттарга айар үлэлэригэр ситиһиини баҕаран, айар холбоһук аатыттан махтал суруктарын уонна сэмэй бэлэхтэрин туттарда.
Самаан сайын кэлэн иһэринэн айылҕаҕа тахсан, кутаа уот аттыгар ирэ-хоро сэлэһии, саха литературатыгар сыһыаннаах биктэриинэни таайыы көрө-нара тоҕо тардылынна. Түмүккэ ытык кырдьаҕас Егор Феофанов ыалдьыт суруйааччылар айымньылаах үлэлэрэ олохтоох айар дьоҕурдаах дьоҥҥо үтүө холобур буолалларын бэлиэтээтэ, инникитин да маннык көрсүһүүлэр тиһигин быспакка салҕанан бара туралларыгар баҕарда.
