14 От ыйа 14.07
  • 31°
  • $ 87,74
  • 95,76

Быйылгы бастыҥ тыа ыала быһаарылынна

16:04, 22 июня 2016
Текст:
Читайте нас на
Яндекс Новости
ЯДВ

Бэҕэһээ, Нам улууһун Кыһыл дэриэбинэтигэр биллэр общественнай, политическай деятель И.Е.Винокуров төрөөбүтэ 120 сылыгар аналлаах улахан ыһыах үрдүк таһымнаахтык буолан ааста.


Бу тэрээһиҥҥэ, бэйэлэрин улуустарыгар бастыҥнарынан буолбут дьиэ кэргэттэр кэлэн, “Тыа ыала” күрэххэ күөн көрүстүлэр. Бу күрэх номнуо алтыс сылын ыытылынна. Тэрийээччилэринэн, Саха Республикатын Ыччакка, Дьиэ кэргэн политикатыгар министерствота, Норуот педагогикатын ассоциацията, М.М. Прокопьева бэрэссэдээтэллээх, Российская семья төрөппүт национальнай комитета буолла.

Быйылгы күрэххэ уопсайа 9 дьиэ кэргэн кыттыыны ылла. Ол курдук, бастаан хас биирдии ыал бэйэтин билиһиннэрэр визиткатын көрдөрдө. Ыллаан-туойан, үҥкүүлээн, оһуохайдаан бэйэлэрин билиһиннэрдилэр, туох дьарыктаахтарын кэпсээтилэр.

Иккис түһүмэххэ, дьиэ кэргэн сыал-сорук туруорунан үлэлэһэ сылдьар бырайыактарын дьүүллүүр сүбэ иннигэр көмүскээтилэр. Бары да талааннаах, дьоҕурдаах дьон түмсэн, бииртэн биир, сонун бырайыактар дьон болҕомтотун тартылар. Кыттыбыт ыаллар үгүстэрэ, сүөһү, сылгы иитэр, кэтэх хаһаайыстыбалаах дьон буолан, бырайыактара оҕону кыра эрдэҕиттэн үлэҕэ сыһыаран иитии, үлэни таптыыр, сүрэхтээх, аһыныгас ыччаты таһаарыы тула буолла.

Нам улууһуттан кыттыбыт 8 оҕолоох Нюргуяна, Иннокентий Ивановтар “Күөх зона” диэн ааттаах оҕо сынньанар күөх зонатын оҥоруу бырайыагынан кытыннылар. Ол курдук, Ивановтар отонноох мастары, эмтээх үүнээйини дэлэччи олордон, хачыал, оҕо эт-хаан өттүнэн сайдарыгар анал площадкатын тутар баҕалаахтар. Үлэ саҕаламмыт, дьиэ кэргэн бары чилиэнэ кыттыыны ылар эбит.

Таатта Харбалааҕыттан кэлбит эдэр ыал Маргарита, Алексей Бродниковтар төрөппүт 2 оҕолорун таһынан, аймахтарын 2 оҕотун иитэ ылбыттар. Олорор бөһүөлэктэригэр икки этээстээх дьиэ туттан, биир бастакынан куораттыы тииптээн, толору хааччыллыыны киллэрбиттэр. Дьиэ хаһаайката дьиэтин бэйэтэ дизайннаан, аныгы истииллээн, бары туспа хостонон, дьиэлэригэр душ, туалет туруорунан, олус бэркэ дьаһаммыттар. Дьиэлээх хаһаайын айылҕаттан уһанар дьоҕурдаах буолан, өссө сварканы толору баһылаан туохтан да, иҥнибэккэ, дьиэтин тупсаҕай көрүҥнээбит. Инникитин тыа сиригэр толору хааччыллыыны киллэриигэ күүскэ үлэлэһэр баҕалаахтар, ити бырайыактарын биир дойдулаахтарыгар тарҕатар былааннаахтар.

Хаҥалас улууһун чиэһин көмүскүү кэлбит, иккиэн Уус-Алдан улууһун Тандатыттан төрүттээх Сахаяна, Александр Готовцевтар эмиэ сонун бырайыагынан кытыннылар. 4 оҕолоох эдэр төрөппүттэр Өктөм бөһүөлэгэр ананан үлэлии кэлиэхтэриттэн, детсад, оскуола, нэһилиэк, улуус биир тарбахха баттанар көхтөөх ыалын ахсааныгар киирбиттэр. Ийэлэрэ Сахаяна үҥкүүһүт, тарбаҕар талааннаах иистэнньэҥ эбит. 4 оҕотун иистэнэн таҥыннарар, культура эйгэтин үлэһитэ. Аҕа баһылык тутааччы. Онон атын сир ыччаттара иккис дойду оҥостубут Өктөмнөрүгэр дьиэ туттан, ньир-бааччы олороллор. “Саха таҥаһын күннээҕи олоххо киллэрии” диэн бэрт сэргэх бырайыагы көмүскээтилэр. Дьиэ кэргэн күннээҕи кэтэр таҥаска сахалыы моһуону, оһуору-мандары тарҕатааччынан буолаллар эбит. Онон Сахаяна Руслановна сахалыы халадаай былааччыйалары, оҕо детсадка кэтэр таҥаһын сахалыы ырбаахы моһуонунан тигэн кэтэрдэр эбит. Инникитин, эдэр ыал иис сыаҕын арыйар былааннаахтарын эттилэр.

Дьэ, ити курдук, тыа сиригэр бэйэлэрэ туспа былааннаах, аныгылыы көрүүлээх эдэр дьон үлэлии-хамсыы, айа-тута олорор. Күрэх кыттыылаахтара бары кэриэтэ элбэх оҕолоохтор. Онон сылыктаатахха, олохпут тупсан, эдэр төрөппүттэр демографическай политика сайдыытыгар тус кылааттарын киллэрсибиттэрин хайгыы көрдүбүт.

Үрдүк таһымнаах улахан тэрээһиҥҥэ Саха Өрөспүүбүлүкэтин дьахталларын сойууһун салайааччы Анжелика Андреева эҕэрдэ эриэккэһин, баҕа санаа бастыҥын тиэртэ.

Түмүккэ, 8 оҕолоох Ивановтар (Нам) кыайыылааҕынан тахсан, республикатааҕы «Сыл бастыҥ дьиэ кэргэнэ” улахан күрэххэ кыттыыны ылар чиэскэ тигистилэр. Күрэх бука бары кыттыылаахтара 5000 суумалаах харчынан сертификаттары, өйдөбүнньүк бэлэхтэри туттулар. Тэрээһин уопсай хаартыскаҕа түһүүнэн түмүктэннэ.

Следите за самым важным и интересным в Telegram-канале и WhatsApp-группе ЯСИА