Саха Өрөспүүбүлүкэтин Ил Дархана Айсен Николаев от ыйын 31 күнүгэр «Биир Ньыгыл Арассыыйа» баартыйа Ил Түмэҥҥэ фракциятын салайааччыта Алексей Колодезниковтыын көрүстэ. Ил Түмэн дьокутаата фракция үлэтин туһунан уонна баартыйа ыытар Норуот бырагарааматын чэрчитинэн социальнай гааһы киллэрии хайдах баран иһэрин билиһиннэрдэ.
Алексей Зосимович эппитинэн, Саха Сиригэр социальнай гааһы киллэрии былаан быһыытынан, графигы тутуһуллан ыытыллан иһэр. Быйыл гаас ситимэ 1800 дьиэҕэ тардыллыаҕа. Ол иһигэр 445 дьиэҕэ ититэргэ уонна ас астыырга анаан туттуллар гаас киирбит.
“Бу сыл бүтүөр диэри бары былааны толоруохпут, өссө былааны таһынан да тахсыаҕа. Бу хайысханан биһиги Уһук Илиҥҥэ бастакыларбыт, оттон дойду үрдүнэн 10 бастыҥнар истэригэр киирэбит.
Бу көрдөрүү, үчүгэй түмүктэри ситиһии баартыйа эрэгийиэннээҕи ыстааба уонна салайааччыта Айсен Сергеевич Николаев көдьүүстээхтик үлэлииллэрин туоһулууллар”, — диэн көрсүһүү кэнниттэн Алексей Колодезников бэлиэтээтэ. Санатан эттэххэ, кини “Сахатранснефтегаз” ньиэп-гаас национальнай хампаанньатын генеральнай дириэктэрэ.
Ону тэҥэ, Алексей Зосимович өрөспүүблүкэ салайааччытын кытта “Биир Ньыгыл Арассыыйа” баартыйатын фракцията парламеҥҥа үлэтин туһунан кэпсэттилэр, бу хайысхаҕа сыһыаннаах боппуруостары дьүүллэстилэр. “Биһиги баартыйабыт фракцията парламент күһүҥҥү уонна сааскы сиэссиэйэлэр уонна пленарнай мунньахтарыгар хайдах, туох үлэни ыыппытын туһунан иһитиннэрдим. Ил Түмэн бары фракцияларыгар туох боппуруостары туруоралларын уонна биһиги фракциябыт чилиэннэрэ ханнык сокуоннары оҥорууну, уопсастыбаннай бырайыактары көҕүлээн киллэрэллэрин тула кэпсэтии ыыттыбыт”, — диэн фракция салайааччытын быһыытынан сүрүн хайысхаларынан кылгастык быһаарда.
Холобура, 2024 сыл сааскы сиэссийэҕэ фракция чилиэннэрэ 41 сокуон барылын көрүүнү көҕүлээбиттэр. Кинилэр бэлэмнээбит Саха Өрөспүүбүлүкэтин Сокуоннарын барыла быраабы бэрээдэктээһин элбэх эйгэтин хабар уонна өрөспүүбүлүкэҕэ сокуону чочуйууга туһуланар. Ону тэҥэ, федеральнай сокуоннарга сөп түбэһиннэрэр. Бу отчуоттуур кэм устата 39 сокуон барыла үһүс ааҕыыны ааһан ылылынна, 3 сокуон барыла бастакы ааҕыынан ааста. Саха Өрөспүүбүлүкэтин 2024 сылга уонна 2025-2026 сылларга былааннаммыт судаарыстыбаннай бүддьүөтүн көрүү кэмигэр фракция чилиэннэрэ 89 көннөрүүнү киллэрбиттэрэ, онтон 84 ылыныллыбыта диэн Ил Түмэн пресс-сулууспата иһитиннэрдэ, суруйда Саха парламент саайт.
