Байыаннай хомуурга барбыт дьон дьиэ кэргэттэригэр Саха сиригэр көрүллүбүт биир кэмнээх 200 тыһ солк төлөбүрү тириэрдиини сэтинньи 1 күнүгэр диэри түмүктүүр былааннаахтар. Ол туһунан суһал штаб брифинигэр вице-премьер Ольга Балабкина эттэ, суруйар СИА.
«Өрөспүүбүлүкэҕэ байыаннай хомуурга ыҥырыллыбыттар дьиэ кэргэттэригэр көмө оҥоруута салҕанан барар. Билигин МФЦ уонна «Госуслуги» порталга тустаахтартан сайабылыанньа ылыыта ыытыллар», — диэтэ Ольга Балабкина.
Вице-премьер санаппытынан, биир кэмнээх 200 тыһ солк кээмэйдээх көмөнү ылыан сөптөөх: 1) кэргэнэ; 2) саахсалара суох түбэлтэтигэр, бииргэ олороллорун дакаастыыр усулуобуйаҕа ылыан сөп; 3) кэргэнэ суох буоллаҕына — оҕотугар, ол иһигэр сокуоннай сааһын сиппит да буоллун, өскөтүн кинилэр биир дьиэҕэ олорор буоллахтарына; 4) кэргэнэ, оҕото суох буоллаҕына — төрөппүттэригэр (опекуннарыгар) аҥаардаан; 5) үөһэ этиллибит аймах дьоно суох буоллаҕына — бииргэ төрөөбүттэригэр, тэҥ өлүүскэнэн.
