Бүлүү улууһун бэтэрээннэрин Сэбиэтин үлэтэ, 2019 сыллааҕы түмүгүнэн, өрөспүүбүлүкэҕэ бастыҥынан биллибитэ. Көхтөөх дьону көҕүлүүр сыалтан Москватаа5ы «Бэс Чагда» санаторийга сынньанарга, доруобуйаны бөҕөргөтөргө 10 путевканы оройуон салалтата биэрдэ.
— Нэһилиэктэр бэтэрээннэрин Сэбиэттэрэ уонна биирдиилээн бэтэрээннэрбит уопсастыбаннай үлэҕэ, спорт араас күрэхтэһиилэригэр, спартакиадаларга олус көхтөөхтүк кытталлар. Кинилэр ортолоругар өрөспүүбүлүкэҕэ тиийэ улуустарын чиэһин эрэллээхтик көмүскүүр киэн туттар дьонноохпут, — диэн кэпсээтэ улуустааҕы бэтэрээннэр Сэбиэттэрин бэрэссэдээтэлэ Герасим Алексеевич Солтуев.
Кини иһитиннэрбитинэн, Бүлүү улууһун баһылыга Сергей Винокуров бэтэрээннэр Сэбиэттэрин көхтөөх дьонун бэлиэтиир сыалтан Москваҕа баар «Бэс Чагда» санаторийга сынньаныыга 10 путевканы туттурда. Онон балаҕан ыйын 30 күнүттэн алтынньы 14 күнүгэр диэри тустаахтар дойду киин куоратыгар доруобуйаларын бөҕөргөтүөхтэрэ, суруйда Николай Федоров.
