Аллайыаха метеорологтара уонна ыраах сытар учаастактарын балыксыттара болдьоҕун иннинэ куоластаатылар.
Кулун тутар 6 күнүгэр Аллайыаха улууһун ыраах сытар учаастактарыгар быыбардыыр хамыыһыйалар чилиэннэрэ тиийдилэр.
“Русскай-Устьетааҕы 42 №-дээх УБК чилиэннэрэ Ольга Ефимова уонна Елена Петренко буранынан Табор учаастагар тиийдилэр. Онно метеорологтар уонна гидрографическай тэрилтэ станциятын үлэһиттэрэ болдьоҕун иннинэ куоластаатылар”, — диэн Аллайыахатааҕы территориальнай быыбардыыр учаастак бэрэссэдээтэлэ Татьяна Портнягина иһитиннэрдэ.
Табор учаастак Хотугу Муустаах акыйаан Илин Сибиир муоратыгар Русскай-Устьеттан хотугулуу-илин 39 км сытар. Оттон Оленегорскайдааҕы 41 №-дээх быыбардыыр хамыыһыйа чилиэннэрэ Валентина Трофимова уонна Мария Слепцова Похвальнай учаастакка куоластааһыны ыыттылар. Манна балыксыттар кытыннылар.
