Саха сирин баһылыга Айсен Николаев тыа хаһаайыстыбатын министиэристибэтин уонна муниципальнай тэриллиилэр салайааччыларын кыттыылаах өрөспүүбүлүкэтээҕи мунньаҕы ыытта. Мунньах кэмигэр сүөһү аһын бэлэмнээһин хампаанньатын түмүгэ таһаарыллан, соруктар быһаарылыннылар.
2026 сылга былааннаах көрдөрүүлэр 423,7 тыһ.туонна от, 29,9 тыһ. туонна сиилэс уонна 14,75 тыһ. туонна сенаж буолаллар.
«Былаан улахан эрээри, толоруллар кыахтаах. Ааспыт сезоҥҥа өрөспүүбүлүкэ 413 тыһ.туонна оту бэлэмнээтэ, сиилэс уонна сенаж былааннарын аһара толордо, кыстык уустуга суох ааста. Бу биһиги аграрийдарбыт улахан үлэлэрин түмүгэ. Бу хайысхаҕа эппиэттээх сирэйдэр куруук хонтуруолу туталларыгар сорудахтаата: техника бэлэм буолуута, звенолар үлэлэрэ, ходуһалар үүнүүлэрэ, үлэһит дьоҥҥо уонна уматыкка-оҕунуохха наадыйыы», — диэтэ Айсен Николаев.
Туспа сорук — иҥэмтиэлээх аһылык кээмэйин улаатыннарыы, туһаныллыбат сирдэри эргииргэ киллэрии, мелиорацияны сайыннарыы уонна цифровой инструменнары, ол иһигэр «Цифровой агрокарта» бырайыагы киллэрии.
Уматыгынан хааччыйыыга ураты болҕомто уурулунна. Уматыгы биэрии бэрээдэгэ бигэргэтилиннэ, сайаапкалар оҥоһулуннулар уонна тыа хаһаайыстыбатын табаарын оҥорооччуларыгар лимииттэр быһаарылыннылар. Муниципальнай тэриллиилэр салайааччыларыгар миэстэлэргэ харгыстары таһаарбат туһугар бары толорооччуларга, сапараапкалыыр ыстаансыйаларга информацияны кылгас болдьоххо тиэрдэргэ сорудахтанна.
