Абый улууһугар тыа хаһаайыстыбатын салаатыгар кыстыкка үөскээбит ыксаллаах быһыыны–майгыны тыа хаһаайыстыбатын уонна аска-үөлгэ политикатын министиэристибэтэ хонтуруолга тутар.
Быйыл республикаҕа от хампаанньата саҕаланыаҕыттан хотугу улуустарга уһун унньуктаах ардахтар туһэннэр, от былаанын үгүс улуустар толорботулар. Маныаха балаҕан ыйыгар салгыы ардах сатыылаан, сир тоҥмокко сыттаҕына үргүччү хаардаан, бүгүҥҥү күҥҥэ Абый улууһугар ыксаллаах быһыы-майгы режимэ биллэрилиннэ.
Ол курдук, Абый улууһугар билиҥҥи туругунан хаар халыҥа балтараа миэтэрэҕэ тэҥнэһэн турар. Хаар ыйдааҕы нуорматын икки-үс төгүл куоһаран, хаар аннынааҕы сир тоҥмокко өрүс, үрэх уонна күөллэр кыайан турбакка сыталлар. Мантан сылтаан улахан техникалар сырыылара тохтоон, от тиэллибэккэ сүөһү, сылгы тутар дьоҥҥо күчүмэҕэйдэри үөскэттэ. Билигин олохтоохтор бэйэлэрин күүстэринэн «Буран» көлөну туһанан, кыралаан отторун таһан саҕалаатылар. Маныаха Уолбут нэһилиэгин Киэҥ Күөл бөһүөлэгэр номнуо от тиэйэ сылдьыбыт үс «Буран» ууга түстэ.
Онон сайын устата угут дьыл туран, онно эбиитин хаар моһуоктаан алтынньы ый саҕаланыыта улууска ыксаллаах быһыы-майгы биллэриллэн, тыа хаһаайыстыбатын министиэристибэтэ суһал дьаһалы ылынна. Ол курдук Абый улууһугар үөскээбит балаһыанньаны туоратар сыалтан сайыҥҥы навигациянан Белай Гора бөһүөлэгэр тиксэриллибит 6 тонна эбии аһылыгы «Полярные авиалинии» көтөр аалларынан үс нэһилиэккэ тиэйиэхтэрэ: Абый нэһилиэгэр – 2 тонна, Кэбэргэнэҕэ – 2 тонна, Сыаҕаннаахха эмиэ 2 тонна.
Маны сэргэ «Сахаэнерго» акционернай хампаанньаны кытта кэпсэтии түмүгэр Абый нэһилигэр 3 тонна, Кэбэргэнэҕэ уонна Сыаҕаннаахха иккилии тонна, Уолбут нэһилиэгэр 0,7 тонна дизельнэй уматыгы тиксэриэхтэрэ. Итини таһынан «Саханефтегазсбыт» акционернай хампаанньа нөҥүө харалла сытар 7,7 тонна бензини 4 нэһилиэк туһанарын хааччыйыахтара.
Өрөспүүбүлүкэ Тыа хаһаайыстыбатын уонна аска-үөлгэ политикатын министиэристибэтин быһаарыытынан кыһыҥҥы суол арылыннаҕына тохсунньу ый бүтүүтэ — олунньу ый саҕаланыыта Уус Алдан улууһуттан 150 тонна оту Абый улууһугар таһар туһунан былааннанна. Көмө оту икки нэһиэлиэгинэн тарҕатыахтара. Кэбэргэнэҕэ 75 тонна, Абыйга – 75 тонна.
Бэлиэтээн эттэххэ, быйыл хоту улуустарга оту тиэйии орускуотун 75 бырыһыана судаарыстыба үбүнэн өйөнүллэр.
