Ааспыт сууккаҕа Саха сиригэр 7 тыһыынча гектар иэннээх 3 ойуур баһаара уонна 86 гектар иэннээх 1 ландшафтнай уот умуруорулунна. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Бу туһунан Экология, айылҕа харыстабылын уонна ойуур хаһаайыстыбатын миниистирин солбуйааччы Андрей Коноплев иһитиннэрдэ. Ойуур баһаардара Бүлүү, Горнай, Сунтаар уонна Орто Халыма оройуоннарыгар тохтотулунна. Ол кэмҥэ космостан уонна авиациянан кэтээн көрүү түмүгүнэн 1 322 гектар иэннээх 5 саҥа ойуур баһаара турбута билиннэ.
Сууккаҕа 14 муниципальнай тэриллиигэ барыта 68 ойуур баһаара уонна 3 ландшафтнай уот турбута биллэр: Абый, Үөһээ Бүлүү, Үөһээ Дьааҥы, Бүлүү, Горнай, Эдьигээн, Кэбээйи, Ленскэй, Мииринэй, Ньурба, Өлүөхүмэ, Орто Халыма уонна Сунтаар оройуоннарыгар. Баһаары умуруорууга 1 704 киһи үлэлиир уонна 170 тиэхиньикэ туһанылынна. Авиация үлэлиир.
«Ойуур баһаарын бохсууга күүһү уонна үбү-харчыны хаҥатыы салҕанар, бастатан туран, Үөһээ Бүлүүгэ бөлөҕү улаатыннарыы көрүллэр», – диэтэ Андрей Коноплев.
Уоту бохсооччулар күүстэринэн Горнай, Ньурба, Өлүөхүмэ оройуоннарыгар 32 182 гектар иэннээх 5 ойуур баһаара тохтотулунна. Баһаартан сэрэхтээх буолуу сезона саҕаланыаҕыттан 2 407 050,41 гектарга 853 ойуур баһаарын умуруорулунна.
