Култуура, духуобунай сайдыы министиэристибэтин, «Победа» өрөспүүбүлүкэтээҕи тэрийэр кэмитиэт көҕүлээһиннэринэн Аҕа дойдуну көмүскүүр Улуу сэрии кыттыылаахтарын ааттарын үйэтитиигэ анаммыт мемориальнай дуоскалары, стелалары, пааматынньыктары, өйдөбүнньүк мэҥэ бэлиэлэри, о.д.а. ыраастыыр, тупсарар туһунан быһаарыы ылылынна.
Акция историческай миэстэлэри, өйдөбүнньүк бэлиэлэри харыстыыр аан дойдутааҕы күҥҥэ сыһыары тутулунна.
Улуу Кыайыыны уһансыбыт дьон ааттарын үйэтитэр тутуулары саҥардар, ыраастыыр, тупсарар туһунан өрөспүүбүлүкэ бырабыыталыстыбатын бэрэссэдээтэлин солбуйааччы Алексей Дьячковскай, култуура миниистирин солбуйааччы Владислав Левочкин улуус баһылыктарын кытта селекторнай мунньахха эттилэр. Тэрээһин Улуу Кыайыы 71 сылыгар ананар.
Бүгүҥҥү ааҕыынан өрөспүүбүлүкэ сиригэр-уотугар сэриигэ сылдьыбыт дьоҥҥо анаммыт 461 өйдөбүнньүк тутуулар бааллар. Итилэртэн баһыйар үгүстэрэ муниципалитеттар бас билиилэригэр киирэллэр. Онон, баһылыктар тупсарыы үлэтигэр сүрүн төһүү буолуохтаахтар. Ону таһынан улуустар баһылыктара пааматынньыктары, өйдөбүнньүк бэлиэлэри хамсаабат баай кадаастырыгар киллэриэхтээхтэр. Хаһаайына суох пааматынньыктары муниципальнай бас билиигэ киллэриэхтээхтэр.
Акция муус устар 18 күнүттэн саҕаланар уонна муус устар 30 күнүгэр түмүктэнэр.
