Дьахталлар өрөспүүбүлүкэтээҕи ХIV cъезтэрин делегата, «Далбар Хотун» өрөспүүбүлүкэтээҕи бастакы куонкурус кыайыылааҕа Лидия Афанасьева этэринэн, олоҕу инники күөҥҥэ таһаарсааччыларынан дьахталлар буолаллар.
Лидия Афанасьева түөрт съезд делегата: «Мин дьахталлар съезтэригэр төрдүс төгүлүн кыттарбыттан үөрэбин уонна киэн туттабын. Бастакы съезкэ Нөмүгү нэһилиэгэр дьахталлар Сэбиэттэрин бэрэссэдээтэлинэн үлэлии сылдьан талыллыбытым. Онтон ыла элбэх бириэмэ ааста. Мин саныахпар, дьахталлар, уопсастыбанныктар, көхтөөх дьон түмсэн съезтииллэрэ хайаан да наада. «Биһиги баарбыт, өрөспүүбүлүкэбит, судаарыстыбабыт сайдарыгар бэйэбит кылааппытын киллэрэбит» диэн туран, кыһалҕалаах боппуруостарбытын дьүүллэһэр улахан мунньахпыт буолар».
Кини кэпсииринэн, съезкэ куруук 700-чэ дьахтар мустар. Кинилэр бары – өрөспүүбүлүкэ туһугар үлэлиир-хамсыыр, баар-суох инники күөҥҥэ сылдьар дьахталлар. «Съезтэр резолюцияларынан элбэх боппуруос быһаарыллан олоххо киирбитин көрө-билэ сылдьабыт. Биири холобурдуур буоллахха, ийэ оҕолонон баран 100 тыһыынчаны ылыыта, оҕолоругар эбии харчы көрүллүүтэ съезкэ туруорсуллубуттара. Онон дьахтар олоҕу хамсатар күүс буолар», — диэн салгыы кэпсиир.
Улуустартан тыа сирин олоҕун-дьаһаҕын, үрүҥүн-харатын эттэринэн-хааннарынан билэр дьон делегатынан талыллан кэлэллэр. Онон бэйэлэрин кыһалҕаларын кэпсииллэр, сөптөөхтүк туруорсаллар.
