Ил Дархан Айсен Николаев бокска Российскай Федерация хамаандатын кылаабынай тренерэ, Россия үтүөлээх тренерэ Виктор Фархутдиновы кытта мунньаҕар 2023 сылга уолаттарга норуоттар ардыларынааҕы турнир ыытар туһунан кэпсэттилэр. Күрэхтэһии РФ уонна Саха сирин үтүөлээх тренерэ Артур Иннокентьевич Пахомов сырдык аатыгар ананар.
«Бокса Саха сиригэр дириҥ силистээх уонна спорт баазовай көрүҥүнэн буолар. Кылаабынайа, баҕалаах ыччат баар. Саха сиригэр өссө элбэх кыайыы баар буоларыгар эрэллээхпин», – диэтэ Айсен Николаев.
Ил Дархан эппитинэн, ыытыллыахтаах турнир спорт бу көрүҥэ өссө сайдарыгар олук ууруохтаах. Виктор Фархутдинов Айсен Николаевка бокс норуоттар ардыларынааҕы ассоциациятын президенэ Умар Кремлёв уонна Россия бокска федерациятын сүрүн сэкирэтээрэ Татьяна Кириенко эҕэрдэлэрин тириэртэ.
Кини Саха сиригэр анаан 1998 сыллаахтан доҕоро, РФ уонна Саха сирин үтүөлээх тренерэ Артур Иннокентьевич Пахомов үтүө аатыгар сүгүрүйээри кэлбитин эттэ. Виктор Фархутдинов Уһук Илиҥҥи уокурук чемпионтатын арыллыытыгар кыттыыны ылла.
Зонатааҕы чемпионат, Дьокуускайга бэс ыйын 13 — 17 күннэригэр ыытыллар. Манна кыайбыттар Россия чемпионатыгар путевка тутуохтара.
