2023 сыл Саха сиригэр Үлэ сылынан биллэрилиннэ. Ол туһунан бэнидиэнньиккэ Айсен Николаев Ил Түмэҥҥэ анал этиитигэр эттэ.
«Биһиги киэҥ территориябыт хас да көлүөнэ үлэтинэн байытыллыбыта. Саха сирин үлэһит дьонун үлэтинэн хаалынньаҥ кырыы сир билигин Россия биир инникилээх региона буолар. Үлэни өрө тутан биһиги норуоппутугар, өрөспүүбүлүкэбитигэр, дойдубутугар сырдык инникини түстүүбүт. Кыаҕы, күүһү, энергияны биир сыалга түмэр туһуттан 2023 сылы — Саха Өрөспүүбүлүкэтигэр Үлэ сылынан биллэрэбин, – диэтэ Айсен Николаев.
Үлэ сылын сүрүн сыалынан уопсастыбаҕа үлэҕэ сыһыаны үтүөҕэ сирдээһин уонна үлэ престиһин үрдэтии буолар.
«Үлэ сиэрдээхтик сыаналаныахтаах. Бырабыыталыстыбаҕа 2023 сыл бастакы кыбаарталыгар «ыйыллыбатах» категорияларга хамнастарын индексациялааһыҥҥа быһаарыы ыларгытыгар сорудахтыыбын, МРОТ-тан кыра буолуо суохтаах», — диэтэ Айсен Николаев.
Ил Дархан бэлиэтээбитинэн, бюджет эйгэтин сорох үлэһиттэрин хамнаһын тэҥнииргэ эбии үбүлээһини көрүү наада. «Кинилэр хамнастара билигин хамнас алын кээмэйигэр эрэ тэҥнэһэр, ити сөбө суох», — диэтэ кини.
Айсен Николаев бастыҥ үлэһит дьоҥҥо 300-түү тыһ солк 50 бириэмийэ аныырын туһунан иһитиннэрдэ.
