Былаан быһыытынан, 2020 сыл ахсынньытыгар диэри өрөспүүбүлүкэҕэ эбии сэттэ оскуола уонна аҕыс дьыссаат тутуута бүтүөхтээх. Дьокуускайга икки оскуола, итиэннэ Томпо, Кэбээйи, Мэҥэ Хаҥалас, Үөһээ Бүлүү уонна Бүлүү улуустарыгар эбийиэктэр тутуулара ыытыллаллар, үөрэх министиэристибэтэ иһитиннэрэр.
Дьокуускайга 203 микрооройуоҥҥа 360 миэстэлээх уонна 31 №-дээх оскуолаҕа 315 миэстэлээх эбии тутуу бу сыл бүтүөр диэри тутуута бүтүөхтээх. Томпо Хаандыгатыгар 220 үөрэнээччигэ анаан элбэх хайысхалаах гимназия тутуллар.
80 миэстэлээх оскуола Бүлүү улууһун Тааһаҕарыгар дьэндэйэр. Үөһээ Бүлүү Тамалакааныгар 145 миэстэлээх оскуола-саад бүтүөхтээх. Кэбээйи Лүксүгүнүгэр 53 оҕону ылар оскуола-саад арыллыаҕа. 35 миэстэлээх оскуола-саад Мэҥэ Хаҥалас Хапчаҕайыгар баар буолуоҕа.
Нам улууһун Бүтэй Үрдүгэр 50 миэстэлээх оҕо саада, маннык кыамталаах оҕо тэрилтэтэ Өлүөхүмэ улууһун Үҥкүрүгэр тутуллар. Ньурба Маарыгар уонна Томпо Новайыгар 35 миэстэлээх дьыссааттар бүтэн эрэллэр. Сунтаар уонна Ньурба улуустарын кииннэригэр туһааннааҕынан 240 уонна 280 миэстэлэрдээх тутуулар ыытылла тураллар. Уус Майа Петропавловскайыгар 90 миэстэлээх оҕо саадын эбийиэгэ дьэндэйэр. Дьокуускайга «Прометей» микрооройуонугар 119 миэстэлээх оҕо саада сыл бүтүүтэ аанын арыйыа.
