Хабаровскай куоракка Дальнай Восток федеральнай уокуругар «Эдэр профессионаллар» диэн орто анал үөрэх кыһатын устудьуоннарыгар күрэстэһии буолбут. Манна Саха өрөспүүбүлүкэтиттэн барыта 20 ыччат ситиһиилээхтик кыттан кэлбит. Дьокуускайдааҕы коммунальнай тутуу техникумун дириэктэрэ Светлана Калинина устудьуоннарын ситиһиилэрин туһунан үөрүүлээх сонуну иһитиннэрдэ.
“Сухое строительство и штукатурные работы» Иван Григорьев кыттан 1 миэстэни ылары ситистэ. «Облицовка плиткой» Игорь Пепе иккискэ таҕыста. «Сантехнические работы» эмиэ биһиги устудьуоммут Алексей Артамонов иккиһи ылла. Кинилэр үлэлэрин дьүүллүүр сүбэ үрдүктүк сыаналаан, биһиэхэ барыбытыгар үлэлиир, айар-тутар баҕабытын улаханнык күүһүртэ. Бу уолаттар манна өрөспүүбүлүкэҕэ ыытыллыбыт күрэхтэһиигэ кыайыылааҕынан тахсаннар, Хабаровскайга үөрэхтэрин кыһатын уонна дойдуларын аатын көмүскүүр үрдүк чиэскэ тиксибиттэрэ. Оҕолорбут биһиги итэҕэлбитин толорон барыбытын, чугас дьоннорун улаханнык үөртүлэр. Уолаттар үһүөн үөрэхтэригэр улахан кыһамньылаах, уопсастыбаннай үлэҕэ куруук көхтөөх кыттыыны ылар ыччаттарбытынан буолаллар», — диэтэ Светлана Валерьевна. Техникум иллээх кэллэктиибэ «Оҕолорбут ситиһиилэрэ – биһиги кыһабыт үөрүүтэ, ситиһиитэ»,- диэн бэлиэтииллэр. Түгэнинэн туһанан устудьуоннара баран кытталларыгар күүс-көмө, өйөбүл буолбут «Эрдэм», «Виват», «Сэттэ», «Якуткерамика», «Ростехпроект» ХЭУО, «Высоких» ЧП, «Теплоэнергия» МУП махтаналлар.
