Муус устар 7 күнүгэр Былаҕачыанайап таҥара — сахалар саамай билгэлиир, кэтэһэр таҥаралара. Бу күн хайдах күн буолар да саас оннук буоларын кэнники сыллар бигэргэттилэр, суруйда Саха сирэ саайт.
Норуот синоптига Тускул муус устары улуустарынан билгэлээтэ.
— Кулун тутар урукку сылларга холоотоххо, олох тибиитэ-хаһыыта суох, чуумпу сылаас ый кэлэн ааста. Ый бүтүүтэ киин, илин эҥэр улуустарыгар күүскэ ириэрэ сырытта. Дьэ, өтөрүнэн көрдөрбөтөҕүн көрдөрдө. Ол курдук, кулун тутар 29-30 күннэригэр Бүлүү эҥэр Ньурбанан ардах курулаччы кутта уонна түүҥҥү өттүгэр лаһыгыраччы тоҥорон кэбистэ. Айылҕа дьиктилэрэ элбээн иһэрэ барыбытын соһутар. Онон туохха барытыгар бэлэмнээх буолуохха наада. Саас хаар сир аайы хатаҕалаан туран түстэ. Онон эмискэ ириэрии буолан, үрэхтэр киллэрдэхтэринэ, сааскы халаан улахан сэрэхтээх. Ол гынан баран эрдэттэн бэлэмнэннэххэ, күөллэр быһыттарын бөҕөргөтөн, сорох сирдэргэ ууларын ыытан, бэлэмнээх олоруохха наада.
Илин эҥэр улуустарга муус устарга, урукку сылларга тэҥнээтэххэ, олох эрдэлээн сылыйыыһы. II — III дэкээдэҕэ күүскэ ириэриэҕэ. Ый бүтүүтэ III дэкээдэҕэ – муус устар 20 күнүн кэнниттэн ардыыр. Күнүс +5С+3С кыраадыс сылаас, түүнүн -8С -6С кыраадыс тымныы. Ый ортотуттан күнүс +6С+4С кыраадыс сылаас, түүн -1С -0С кыраадыс.
Муус устар киин улуустарга былырыыҥҥыга тэҥнээтэххэ, улахан хатааһына суох, сылаас ый буолара сабаҕаланар. Ый ортотугар 5 күн хаардыыр, онтон 5 күн ардыаҕа. II дэкээдэҕэ күнүс +2С+4С кыраадыс сылаас, түүнүн -8С -6С кыраадыс тымныы. Ый ортотугар күнүс +8С+6С кыраадыс сылаас, түүн -2С -1С кыраадыс тымныы.
Бүлүү эҥэр улуустарга киин улуустары кытта тэҥнээтэххэ, үһүс дэкээдэ диэки биллэрдик сылыйыыһы. I дэкээдэҕэ күнүс -3С-1С кыраадыс тымныы, түүнүн -14С-10С кыраадыс тымныы. Ый ортотугар күнүс +6С+4С кыраадыс сылаас, түүн -2С -1С кыраадыс тымныы буолсу.
Соҕуруулуу-арҕаа улуустарга быйыл иккис дэкээдэттэн саҕалаан балачча сылыйыыһы, онтон III дэкээдэҕэ күүстээх ардах түһэн, хаар эмискэ барыыһык. Онон ыам ыйыгар хара сир буолсу. I дэкээдэҕэ күнүс -3С-5С к кыраадыс тымныы, түүнүн -10С -14С кыраадыс тымныы. Ый ортотугар күнүс +2С+4С кыраадыс, түүнүн -7С -5С кыраадыс тымныы. III дэкээдэҕэ күнүс +6С+4 С кыраадыс сылаас, түүн +2С +1С кыраадыс сылаас буолсу.
Өймөкөөн Саха сирин саамай тымныы улууһунан биллэр. Ол гынан баран урукку сыллардааҕар муус устар сымнаһыар буолла. Быйыл хоту улуустарга муус устарга сөҥүүтэ олох кэмчи. I дэкээдэҕэ күнүс -4С-2С кыраадыс тымныы, түүнүн -18С-16С кырадыыс . Ый ортотугар -6С-3С кыраадыс тымныы, түүнүн -15С -11С кыраадыс тымныы. III дэкээдэҕэ күнүс +2С+1С кыраадыс сылаас, түүн -8С -6С кыраадыс тымныы.
Дьааҥыга былырыыҥҥыга тэҥнээтэххэ, бастакы иккис дэкээдэлэргэ — тымныы. Хаара олох кэмчи. Бу ыйга I дэкээдэҕэ күнүс -5С-3С кыраадыс тымныы, түүн -14С-10С тымныы. II дэкээдэҕэ күнүһүн -5С-7С кыраадыс тымныы, түүнүн -14С-10С кыраадыс тымныы. III дэкээдэҕэ күнүһүн+3С+1С кыраадыс сылаас, түүн -8С-5С кыраадыс тымныйыыһы.
Халыма-Индигиир эҥэр улуустарга урукку сыллардааҕар биллэ тымныйбыта, онон бастакы-иккис дэкээдэлэргэ — тымныы. Былырыын муус устарга хаар олох түспэтэҕэ, быйыл II-III дэкээдэлэр балай да хаардаах буолсулар.
Бу ый бастакы дэкээдэтигэр күнүс -7С-4С кыраадыс тымныы, түүн -9С-6С тымныы. II дэкээдэҕэ күнүһүн -6С-2С кыраадыс, түүнүн -16С-7С кыраадыс тымныы. III дэкээдэҕэ күнүһүн +4С+2С кыраадыс сылаас, түүн -8С-6С кыраадыс тымныы.
Артика эҥэр улуустарга муус устар бастакы, иккис дэкээдэлэригэр түүҥҥү өттүгэр балай да тымныйыыһы. Бу ый бастакы дэкээдэтигэр күнүс -14С-10С кыраадыс тымныы, түүн -20С-16С тымныы. II дэкээдэҕэ күнүһүн -13С-10С кыраадыс тымныы, түүнүн -19С-15С кыраадыс тымныы. III дэкээдэҕэ күнүһүн 9С-8С кыраадыс тымныы, түүн -14С-10С кыраадыс тымныы.
