Тиэргэн таһынааҕы бөх былаһааккатын тэрийиигэ, ыраастык тутууга ким эппиэттиирий? Мунньуллубут бөҕү төһө чаастатык тиэйиэхтээхтэрий? Ааспыт нэдиэлэҕэ бу буоппуруостарга Саха Өрөспүүбүлүкэтин тутууга уонна дьиэни-уоту кэтээhиҥҥэ судаарыстыбаннай Управлениета эппиэттээтэ.
РФ сокуонунан бөҕү хомуйар былаһаакка элбэх кыбартыралаах дьиэ тиэргэнигэр турар итиэннэ дьиэни бас билээччилэр уопсай баайдарыгар киирэр буоллаҕына, былаһаакканы ыраастык тутуу салайар хампаанньа эппиэтинэһигэр киирэр (УК, ТСЖ, ЖСК о.д.а.). Оттон бөҕү тиэйиигэ региональнай оператор эппиэттиир. Маныаха бөҕү тиэйии кэмигэр ыһыллыбыт бөҕү-сыыһы кини хомуйар эбээһинэстээх.
Тымныы кэмҥэ, температура орто кээмэйэ -5 °C, онтон намыһах буоллаҕына, бөҕү үс сууккаҕа бииртэн аҕыйаҕа суохта тиэллиэхтээх. Сылааска, температура орто кээмэйэ +5 °C, онтон сылаас буоллаҕына, бөх хас күн аайы тиэллиэхтээх.
«Өскөтүн дьиэ таһыттан бөх кэмигэр хомуллубат буоллаҕына, олохтоохтор быһа бөҕү хомуйар тэрилтэҕэ – региональнай операторга биллэриэхтээхтэр», — диэн Саха Өрөспүүбүлүкэтин тутууга уонна дьиэни-уоту кэтээhиҥҥэ судаарыстыбаннай Управлениетын салайааччытын солбуйааччы Павел Корнилов этэр.
Чааһынай секторга бөх былаһааккаларыгар эппиэтинэһи олохтоох салайыныы уорганнара сүгэллэр.
