Мэҥэ Хаҥалас улууһун Майа сэлиэнньэтигэр «Төрүт түөлбэм төлкөтө» түөлбэ көхтөөх дьонун II—с өрөспүүбүлүкэтээҕи форума буолла.
Форум тэрийээччилэринэн Мэҥэ Хаҥалас улууһун социальнай политикатын управлениета, СӨ түөлбэлэрин Ассоциацията, СӨ ыччат дьыалаларыгар уонна социальнай коммуникацияларга министиэристибэтэ, СӨ муниципальнай тэриллиилэрин Сэбиэтэ буолаллар.
Форуму ыытыы сыала—соруга нэһилиэнньэ олохтоох суолталаах боппуруостарынан дьарыктанан, олохтоох бэйэни салайыныы тиһигин сайыннарыы.
Өрөспүүбүлүкэҕэ түөлбэлэр сайдыыларын саамай тутаах боппуруостарын уонна этиилэрин дьүүллэстилэр, кыттааччылар түөлбэ үлэтигэр уопуттарын атастастылар.
Форум үлэтин кэмигэр Амма, Таатта, Мэҥэ Хаҥалас, Горнай, Чурапчы оройуоннарын түөлбэлэрэ бастыҥ практикаларын билиһиннэрдилэр.
Ыччат дьыалаларыгар уонна социальнай коммуникацияҕа министиэристибэтин специалиалистара түөлбэлэр Ил Дархан граныгар кыттыыларыгар сүбэ-ама оҥордулар.
Форум чэрчитинэн улуус, нэһилиэк дьаһалталара, экспертнай бөлөҕү кытта түөлбэ тула бииргэ үлэлээһин механизмнарын уонна социальнай кыһалҕалары быһаарыыга кыттыгас саҥа оруоллары уонна кыахтары дьүүллэстилэр. Ону сэргэ экспертэр НКО-лары, ТОС-тары регистрациялааһын, отчуоттааһын боппуруостарыгар, социальнай бырайыактааһыҥҥа үөрэттилэр.
Тэрээһин түмүгэр түөлбэ үлэтин- хамнаһын сүрүн соруктарынан «Бириэмэ капсулата» оҥоһулунна, ону сэргэ кэлэр 5 сылга баҕа санаалар этилиннилэр. Мэҥэ Хаҥалас оройуонун баһылыгын солбуйааччы Альбина Григорьева өрөспүүбүүлүкэ ТОС-тарын Ассоциацияларын бэрэссэдээтэлигэр Ксения Васильеваҕа капсуланы туттарда, кинини 2027 сылга арыйыахтара.
Форум сабыллыытыгар 289 делегат алгыстаах саламалара ыччат уонна социальнай коммуникация дьыалаларыгар министри солбуйааччы Андрей Сосновскайга туттардылар.
Форум түөлбэлэр сайдыыларыгар саҥа үктэлинэн буолан, биир санаанан салайтаран, дойдубут сайдарын туһугар кэскиллээх кэрдиис кэмэ салҕанар, СИА-ҕа суруйда Горнай улууһуттан Айталина Санникова.
Бастыҥ үлэлээх түөлбэ салайааччылара наҕараадалланнылар:
1. СӨ ыччат дьыалатыгар уонна социальнай коммуникация министиэристибэтин махтал суругунан Альбина Михеева Бэрдьигэстээх нэһ. “Чэбдик” ТОС
2. СӨ мунициципальнай тэриллиилэр сэбиэттэрин Бочуоттаах Грамотатынан Айталина Олесова, “Киин” ТОС уонна Светлана Лю, “Үрдэл” ТОС бэрэссэдээтэлэ
3. СӨ мунициципальнай тэриллиилэр сэбиэттэрин Махтал суругунан Алена Ю, Бэрдьигэстээх нэһ. Ыччат политикатыгар, култуураҕа, спорка Агентствотын общественноһы кытта үлэҕэ специалиһа.
