2027 сылга үлэлиир биэнсийэлээхтэргэ сайабылыанньата суох биэнсийэлэрин хос ааҕыы оҥоһуллуоҕа. Бу туһунан РИА Новости-га Судаарыстыбаннай Дуума дьокутаата Алексей Говырин («Биир ньыгыл Арассыыйа» баартыйа) иһитиннэрдэ, диэн суруйда Саха сирэ саайт.
Парламентарий үлэлиир биэнсийэлээхтэргэ төлөбүрү үрдэтии мэхэньиисимнэрэ хайдах үлэлииллэрин быһаарда:
Индексацияны сөргүтүү. 2025 сыл тохсунньу 1 күнүттэн үлэлиир биэнсийэлээхтэргэ страховой биэнсийэни үрдэтии уопсай бэрээдэгэ төннөр.
Атырдьах ыйынааҕы хат ааҕыы. Уопсай индексация таһынан эбии төлөбүрү үрдэтии өссө биир ньымата хаалар. Сыл аайы атырдьах ыйын 1 күнүттэн үлэ биэрээччи төлөөбүт страховой кылааттарынан сайабылыанньата суох хат ааҕыы оҥоһуллуоҕа. Бу эбиллии үс биэнсийэ коэффициенынан муҥурданар.
2027 сылтан икки төгүллээх индексация. Дьокутаат муус устарга этиллибит «икки төгүллээх индексация» формулатын быһаарда. Бу уларыйыы страховой эрэ биэнсийэлэргэ сыһыаннаах. Саҥа бэрээдэк 2027 сыл тохсунньу 1 күнүттэн олоххо киириэҕэ:
- Олунньу 1 күнүттэн биэнсийэ кээмэйэ ааспыт сыллааҕы инфляция таһымынан үрдүөҕэ.
- Муус устар 1 күнүттэн — Социальнай пуонда бүддьүөтүн дохуотуттан уонна орто хамнас үрдээһинин инфляцияны кытта араастаһыытын учуоттаан эбиллиэҕэ.
