Социальнай хантараак үбүн олох ыарахаттарын туорааһыҥҥа туһаныахха сөп буолуо. Билигин хантараак көрүллэр хайысхаларын кэҥэтиигэ үлэ барар. Бу туһунан үлэ миниистирэ Елена Волкова социальнай ситимнэринэн быһа эфир кэмигэр иһитиннэрдэ.
«Социальнай хантараагынан көрүллэр көмө харчытын дьиэ өрөмүөнүгэр, хаһаайыстыбаннай тутууларга, кыстыкка бэлэмҥэ, баҕа өттүнэн арыгыттан эмтэниигэ уо д.а. ыал социальнай адаптацияны ааһарыгар туһуламмыт тэрээһиннэргэ туттуохха сөп буолуо. Билигин ити салаалары олоххо киллэриигэ үлэ барар«, — диэтэ миниистир.
Билиҥҥитэ социальнай хантараак кэтэх хаһаайыстыбаны уонна бэйэ дьарыгын сайыннарыыга туһаныллар. Инникитин хантараак үбүн үлэ булууга, идэ ылыыга, эбии профессиональнай үөрэхтээһиҥҥэ ыытары толкуйдуубут, диэтэ миниистир.
Бэйэ дьыалатын тэрийиигэ, кэтэх хаһаайыстыбаны сайыннарыыга ортотунан 155 тыһ. солкуобай көрүллэр, оттон олох ыарахаттарын туорааһыҥҥа — 17900 солк.
Быйыл социальнай хантараакка барыта 330 мөл солк көрүллүбүт.
