Төгүрүк сылы быһа үлэлиир «Саюри» тэпэлииссэлэрэ оҕурсунан, помидорунан о.д.а күөх үүнээйилэринэн аатыраллар. Мантан ыла «Саюрилар», эбии клубниканы үүннэрэн саҕалыахтара.
Билигин тэрилтэ агрономнара үс араас суорду үөрэтэ сылдьаллар. Онон сотору кэминэн чугастааҕы маҕаһыыммытыттан олохтоох тэпэлииссэҕэ үүннэриллибит клубниканы атыылаһар буолуохпут.
«Боруобаҕа буолан, хас биирдии көрүҥүттэн кыра-кыралаан үүннэрдибит. Биһиги тыйыс айылҕабытыгар клубника ханнык көрүҥэ табыгастааҕын анал үлэһиттэр быһаарыахтара. Маныаха бу отон амтанын, иҥэмтиэтин, төһө түргэнник үүнэрин ырытан көрүөхтэрэ. Чинчийиигэ кыайбыт көрүҥ атыыга тахсыаҕа», — диэн «Саюри» салайааччыта Сергей Балнайтис кэпсээтэ.
“Саюри” тэпэлииссэлэрэ сылы быһа Дьокуускай олохтоохторун бэйэ үүннэрии оҕуруотун аһынан аһатар. Сыллата бу тэрилтэ сүүһүнэн туонна оҕурсуну, помидору о.д.а күөх үүнээйилэри үүннэрэр, куорат уонна куорат таһынааҕы уһуйааннары хааччыйар, чааһынай дьоҥҥо да атыылыыр. Бородууксуйа биир халыып хаачыстыбаҕа сөп түбэһэрин туһугар, үүннэриилэргэ эбии ыраастабылы барбыт ууну куталлар. Тэпэпэлииссэлэр бары анал бүрүөлээхтэр, ол иһин күн сырдыга ордук үчүгэйдик киирэр.
ТОР «Якутия» резиденин статуһун барыта 27 тэрилтэ бас билэр. Бу тэрилтэлэр бырайыактара олоччу олоххо киирдэҕинэ, Өрөспүүбүлүкэ үбүгэр 12,7 млрд. солк. үбү чааһынай инвестициянан киллэриэхтэрин син, уонна 1500 тахса үлэ миэстэтэ тахсыан сөп. Билигин 11 бырайыакка 487 киһи үлэлиир. Үлэлии турар бырайыактарга киирбит үп сүрүн кэриҥэ 3 млрд. солк.
