Саха сириттэн аан дойду чөмпүйүөнэ Сандаара Апросимова уонна Беларусь Өрөспүүбүлүкэтиттэн Европа чөмпүйүөнэ Виктория Николаева икки ардыларыгар нуучча уонна сүүс харахтаах дуобакка суперматч түмүктэннэ, кыайыыны Сандаара ылла.
«Турнир биһиги өрөспүүбүлүкэбитигэр дуобат спордун киэҥник тарҕатар, сайыннарар соруктаах тэриллибитэ. Бу спорт көрүҥэ биһиэхэ сайдар, ол иһигэр биллэр-көстөр спортсменнарбыт маннык матчтарга кытталлара улахан оруоллаах. Бүгүн элбэх киһи матчы көрдө, Сандаара уонна Виктория холобурдарыгар элбэх эдэр дьон дуобатынан дьарыктанарга сананыа диэн эрэнэбин. Бу сүрүн түмүк. Төһө да эдэрдэрин иһин, иккиэн ааттаах-суоллаах спортсменкалар. Кинилэр ааттара дойдуларын эрэ буолбакка, аан дойду дуобатын историятыгар киирдилэр», — диэн регион бырабыыталыстыбатын бэрэссэдээтэли солбуйааччы Сергей Местников бэлиэтээтэ уонна спортсменнары, кинилэр тренердэрин махталын биллэрдэ.
Нуучча дуобатыгар икки микроматчы уонна сүүс харахтаах дуобакка икки баартыйа түмүгүнэн, Сандаара Апросимова 6:2 ахсаанынан кыайда. Сергей Местников кыайыылаахха 100 тыһыынча солкуобайдаах сэртипикээти, матч кыттыылааҕар 50 тыһыынча солкуобайдаах сэртипикээти туттарда.
Виктория Николаева оонньуу олус интэриэһинэйин бэлиэтээтэ уонна матч тэрийээччилэригэр махтанна.
«Кыайыыбыттан олус үөрдүм. Маннык үчүгэй матчы тэрийбиттэригэр уонна миигин кытта Виканы ыҥырбыттарыгар тэрийээччилэргэ махтанабын. Түмүкпүнэн астынабын. Миигин өйөөбүт, көрбүт-истибит дьоҥҥо барыларыгар махтанабын», — диэн Сандаара Апросимова санаатын үллэһиннэ.
Сандаара тренерэ, СӨ үтүөлээх тренерэ Иван Павлов этэринэн, матч олус интэриэһинэйдик ааста, икки кыыс күүстээх оонньууну көрдөрдүлэр.
Спортсменнары өйөөн тренердэр, биллэр-көстөр уонна саҥа саҕалааччы спортсменнар кэллилэр. Бырайыагы тэрийээччилэр — «Полюс» көмүс хостуур хампаанньа уонна СӨ Кэскиллээх көлүөнэтин пуондатын өйөбүллэринэн «Кэлэр кэмнэр пааркалара» уонна СӨ Дуобат федерацията.
Тэрээһин Арассыыйа Бэрэсидьиэнэ Владимир Путин көҕүлээбит «Арассыыйа спорда» федеральнай судаарыстыбаннай бырагыраама сыалларын-соруктарын толорууга туһуланар.
