Бэс ыйын 29 күнүгэр «Биир ньыгыл Россия» баартыйаттан Саха сирин парламеныгар быыбарга кандидаттар испииһэктэрэ бигэргэннэ.
«Бу күнтэн олус эппиэтинэстээх быыбар кэмэ саҕаланар», — диэтэ өрөспүүбүлүкэ баһылыга, баартыйа регионнааҕы салаатын сэкирэтээрэ Айсен Николаев. Кини 2023 сыл балаҕан ыйыгар буолар Ил Түмэн быыбарыгар баартыйа сыалын уонна соруктарын эттэ.
«Айсен Николаев бэлиэтээбитинэн, «Биир ньыгыл Россия» баартыйа фракцията Саха сирин парламеныгар биир модун политическай күүс буолар, социальнай -экономическай балаһыанньа туруктаах буолуутугар уонна регион сайдыытыгар быһаарыылары ылыыга», — өрөспүүбүлүкэ народнай депутата Сахамин Афанасьев комментарийдаата.
Народнай депутат эппитинэн, фракция Ил Түмэҥҥэ биллэр бэлиитиктэринэн, араас салааҕа үлэлиир уопуттаах, уопсастыба билинэр дьонноох. «Ил Түмэҥҥэ биһиги фракциябыт чилиэннэрэ политическай быһаарыы ылыыга инники күөҥҥэ сылдьаллар. Парламенынан ылыллыбыт сокуоннар — бу Айсен Николаев ыытар бэлиитикэтэ, бу судаарыстыба баһылыга Владимир Путин ыытар бэлиитикэтэ», — диэтэ Сахамин Афанасьев.
«Ылыллар быһаарыылар уонна сокуоннар, дьон олоҕун хаачыстыбатын тупсарыыга туһуланаллар. Айсен Николаев бэлиэтииринэн, билигин боростуойа суох кэмҥэ, Россия президенин тула мустуохтаахпыт. «Биир ньыгыл Россия» баартыйа президент баартыйата. Өрөспүүбүлүкэ сокуону оҥоруу таһымыгар сөптөөх быһаарыылары ылан, президеммитин өйүүр баартыйа буолар», — диэтэ кини.
