18 Тохсунньу 18.01
  • -48°
  • $ 73,82
  • 83,32

Саха сирин бырабыыталыстыбатын отчуота: Уус Маайа олохтоохторо сибээс мөлтөҕүн эттилэр

09:16, 17 февраля 2016
Текст:

Саха сирин бырабыыталыстыбата сылын аайы ыытыллар нэһилиэнньэ иннигэр отчуота олунньу 5 күнүгэр Уус Маайа улууһугар түмүктэннэ. Бырабыыталыстыба бэрэссэдээтэлин солбуйааччы Игорь Никифоров салайааччылаах бөлөх оройуон биэс нэһилиэгэр сырытта: Уус Маайаҕа, Уус Миил сэлиэнньэтигэр, Петропавловскайга, Эльдикааҥҥа уонна Солнечнайга. 


Ситэриилээх былаас уорганын үлэһиттэрэ дьону-сэргэни кытта тырааныспар мэһэйэ суох сырыытын, сибээһинэн хааччыйыы, тыа хаһаайыстыбатын, ДьКХ, доруобуйа харыстабылын, үп-харчы тустарынан ырыттылар.

Бүгүҥҥү туругунан хочуолунай уонна дизельнэй электростанция үлэлэригэр кыһалҕа үөскээбит. «Олохтоохтор баһыйар үгүстэрэ пенсиялаахтар, дьиэбитин оһоҕунан ититэргэ күһэллэбит», — дэһэллэр нэһилиэк олохтоохторо. Үөскээбит бу кыһалҕа ситэри быйыл быһаарыллыахтаах. «Теплоэнергосервис» АУо инвестиционнай бырагырааматын чэрчитинэн хочуолунай саҥа дьиэтэ тутуллуохтаах. Эбии туһанааччылары кииннэммит ситимҥэ холбуур кыах баарын туһунан «Теплоэнергосервис» тэрилтэ үлэһитэ СИА-ҕа эттэ.

Уус Миил олохтоохторун интернет уонна суотабай сибээс хаачыстыбалара долгутар. Ростелеком бу кыһалҕаны 2018 сылга диэри быһаарар былааннаах.

«Почта России» Уус Маайаҕа үлэтэ сөргүтүллүбүтүн туһунан иһитиннэрии олоҕо суоҕа бырабыыталыстыба отчуотун кэмигэр билиннэ. «Почта Дьокуускайтан кыһыҥҥы суолунан нэдиэлэҕэ үстэ улууска тиэрдиллэр» , — диэн докумуоҥҥа суруллар. Дьиҥэр, дьон суруйтарар хаһыата, сурунаала, корреспонденцията Уус Миилгэ биир ый хойутаан тиэрдиллэр. Маннык кыһалҕа улуус киинигэр эмиэ баар. Уус Маайа – Амма хайысханан, бөһүөлэк иһинээҕи суол мөлтөх туруктаммыттара, ону оҥоруу уһун кэмҥэ тардыллыбыта олохтоохтору долгутар. Олорор дьиэни тутууга, тыа хаһаайыстыбатыгар кыһалҕалар аҕыйаҕа суохтар. Дьон-сэргэ бырабыыталыстыба үлэһиттэриттэн ОДьКХ-ҕа сыһыаннаах элбэҕи ыйыттылар. Маны сэргэ доруобуйа харыстабылын, үөрэх, култуура, спорт, тыа дьоно үлэлээх буолууларын ырыттылар.

Уус Маайа олохтоохторо бырабыыталыстыба өйөбүлүн иһин махтаннылар уонна ситэриилээх былаас үлэтин үрдүктүк сыаналыылларын биллэрдилэр.

Промышленность миниистирэ Андрей Панов, ДьКХ миниистирин солбуйааччы Наталья Сивцева, култуура, доруобуйа харыстабылын, баай-дуол сыһыаннаһыыларын салайааччыларын солбуйааччылар Владислав Левочкин, Людмила Вербицкая уонна Валерий Великих, ону таһынан тыа хаһаайыстыбатын, ыччат министиэристибэлэрин, дьон-сэргэ көҕүлээһиннэрин сайыннарыы департаменын исписийэлиистэрэ бырабыыталыстыба бөлөҕүн састаабыгар үлэлээтилэр.

0
0
18 января 18.01
  • -48°
  • $ 73,82
  • 83,32