«Биһиги уматыгы аҕалыыга үлэни эрдэттэн саҕалаабыппыт, бары хантараактар бааллар, собуоттары уонна бөдөҥ корпорациялары кытта сыһыан олохтоммута. Санкт-Петербургтааҕы норуоттар икки ардыларынааҕы экэниэмикэ пуорумун сабыылаах чааһыгар «Газпромнефть» салалтатын кытта хотугу таһаҕаһы тиэйиинэн уматыгы тохтоло суох тиэрдии туһунан кэпсэппиппит. Саха сиригэр анаан сүрүн кээмэй «Саханефтегазсбыт» нөҥүө толору хааччыллыа диэн мэктиэлээбиттэрэ. Билигин ол баар», — диэн Айсен Николаев «Якутия, вперёд!» биэриигэ кэпсээтэ.
Өрөспүүбүлүкэ баһылыга бэлиэтээбитинэн, кыһалҕалар чааһынай хампаанньаларга үөскүүллэр. Кинилэр Гражданскай оборуона дьыалаларыгар уонна нэһилиэнньэ олоҕор-дьаһаҕар куттал суох буолуутун хааччыйыыга миниистир Дмитрий Лепчиковтыын сибээскэ олороллор.
«Бары күүһүнэн балаһыанньаны көннөрүөхпүт. «Саханефтегазсбыт» уонна атын хампаанньалар хааччахтааһыннара өйдөнөр. Дьон канистраларга куттан, гараастарга хаһаанарын тохтотор туһуттан, омуннаах наадыйыыны хааччахтыыбыт. Бу биһиэхэ балаһыанньаны этэҥҥэ туоруурга көмөлөһүө дии саныыбын. Саппааһы суһал ыстаап куруук кэтээн көрөр. Чопчу боппуруостар түргэнник уонна уһата-кэҥэтэ барбакка, өрөспүүбүлүкэ олохтоохторун интэриэстэригэр быһаарыллаллар», — диэн Саха сирин баһылыга бэлиэтээтэ.
