Саха сирин ыалыгар иккис оҕо төрөөтөҕүнэ федеральнайдааҕы уонна өрөспүүбүлүкэтээҕи ийэ хапытаалларын холбоон 756 602 солк көрүллүө. Ол туһунан үлэ миниистирэ Елена Волкова суруналыыстарга иһитиннэрдэ.
Россия президенэ Владимир Путин Федеральнай Мунньахха ыҥырыытыгар иккис оҕоҕо ийэ хапытаала 150 тыһ солк улаатыннарар туһунан эппитэ. Онон кээмэйэ 616 617 солк тэҥнэспитэ.
«Биһиги өрөспүүбүлүкэбитигэр, Уһук Илин атын субъектарыгар курдук, ааспыт сылтан эбии өрөспүүбүлүкэтээҕи ийэ хапытаала иккис оҕо төрөөтөҕүнэ көрүллэр. 2020 сылга, баар усулуобуйаларга олоҕуран, регионнааҕы ийэ хапытаала иккис оҕоҕо 139 985 солк тэҥ. Онон улаатыннарыыны учуоттаатахха, Саха сиригэр иккис оҕолорун төрөппүт дьиэ кэргэн ылар суумата холбоон 756 602 солк буолар», — диэтэ миниистир.
