2025 сылга өрөспүүбүлүкэ федеральнай бюджеттан эбии үбүлээһини тутта, 2027 сылга диэри сылын аайы эбии 2,7 млрд солк көрүллүөҕэ. Бастатан туран, харчыны биэс саҥа авиаотделение тутуутугар тыыраллар, ол иһигэр Өлүөхүмэ уонна Ленскэй оройуоттарыгар эбийиэктэри быйыл үлэҕэ киллэриллэр. Андрей Коноплёв бэлиэтээбитинэн, бу отделениеларга штат бигэргэннэ, 180-ча киһи үлэҕэ киирдэ.
111 техника ылылынна, баһаар балаһыанньатын кэтээн көрүүгэ 29 сөмөлүөт, икки бөртөлүөт уонна 35 пилота суох көтөр аппараат тепловизордаах бэлэмнэннэ.
Ордук болҕомто этиҥтэн тахсар уот барыытын кытта охсуһууга ууруллар. Өлүөхүмэҕэ этиҥи тэйитэр тэриллэри наука өттүттэн үөрэтэр сыаллаах туруорулуннулар. «Кэнники кэмҥэ этиҥтэн уот барыыта элбээтэ. Ону үөрэтэр сыалтан «Якутлесресурс» космофизика институтун кытта этиҥи тэйитэр тэриллэри — уон анал мачтаны туруорда», — диэтэ Андрей Коноплёв.
