Өрөспүүбүлүкэ былаастара өрүһүнэн пассажирдары таһыыны субсидиялааһыҥҥа үп-харчы көрүөхтэрэ. Бу туһунан Саха сирин баһылыга Айсен Николаев «Саха» ГТРК ханаалыгар «Прямой разговор» биэриигэ иһитиннэрдэ.
«Быйыл өрүс тырааныспарынан пассажирдары таһыыны субсидиялааһыҥҥа үп-харчы көрүлүннэ, ону сотору кэминэн бырабыыталыстыба тыырыаҕа. Уонна, эрэнэбин, бу биһиги уу суолларбытыгар тиһигин быспакка айаны тэрийиигэ көмөлөһүөҕэ», — диэтэ Айсен Николаев.
Кини чуолкайдаан эппитинэн, Өлүөхүмэҕэ рейстэр номнуо саҕаламмыттар, оттон Сангаарга уонна Ленскэйгэ чугастааҕы кэмҥэ былааннаналлар.
Саха Өрөспүүбүлүкэтин парламенын мунньаҕар тырааныспар миниистирин солбуйааччы Семен Коркин өрүс суолунан таһыыны субсидиялааһыҥҥа 77 мөлүйүөн солкуобайы тыырыы былааннанарын туһунан иһитиннэрдэ.
