Саха сиригэр хас да саастаах киһи тэллэйдии баран баран дьиэлэригэр төннүбэтэхтэр. Икки биэнсийэлээхтэри хаһыс эмэ күнүн көрдүүллэр. Атырдьах ыйын 17 күнүгэр сүппүт эмээхсини булбуттара.
Дьокуускайга 82 саастаах эбээлэрэ тэллэй хомуйа тахсан баран сүппүтүн дьоно биллэрбиттэрэ. Дьиҥэ саастаах дьахтар сүппүт сиригэр сотовай төлөпүөн хабар эбит эрээри, кини төлөпүөнүн дьиэтигэр хаалларан барбыт.
Көмөҕө кэлбит быыһыыр сулууспа үлэһиттэрэ тепловизор көмөтүнэн 4 квадратнай километры көрбүттэр. Быыһааччылар, полициялар уонна аймахтара эмиэ сүппүт сирин диэки көрдөөбүттэр. Киэһэлик чугаһыгар кинологтар эмээхсини дьүөгэтин кытта арахсыбыт сириттэн 1 км ыраах сиргэ булбуттар.
Мииринэй оройуонугар номнуо уонтан тахса күн 60-ча саастаах сүппүт эр киһини көрдүүллэр. Кини тэллэйдии диэн атырдьах ыйын 7 күнүгэр барбыт онтон ыла бэйэтин туһунан биллэрбэтэх. Ону сэргэ, Нерюнгрига телевышка таһын диэки 84 саастаах оҕонньор тэллэйдии тахсан баран эмиэ сүппүт.
