Ытыктабыллаах Саха сирин олохтоохторо! Саха Өрөспүүбүлүкэтин салалтатын аатыттан уонна тус бэйэм эһигини Саҥа дьылынан уонна Ороһуоспанан ис сүрэхпиттэн итиитик-истиҥник эҕэрдэлиибин!
Саҥа дьылы көрсө хас биирдиибит үгэс быһыытынан түмүк оҥостор, саҥа соруктары туруорар кэмэ тиийэн кэллэ. Биһиги өрөспүүбүлүкэбитигэр 2019 сыл Сомоҕолоһуу сылынан биллэриллэн, хас биирдии киһи олоҕор үтүө уларыйыы тахсарын туһугар түмсүүлээхпитин көрдөрдүбүт. Сахабыт сирин 600 тыһыынчаттан тахса олохтооҕо куораттарга, бөһүөлэктэргэ тупсаҕай эйгэни тэрийэр хамсааһыҥҥа көхтөөхтүк кытынна.
Быйылгы сылга Саха сирин сайдар тэтимин эбии күүһүрдэр уонна түргэтэтэр уларыйыылар буоллулар. Россия Президенэ Владимир Путин Өлүөнэ муостатын тутарга быһаарыы ылыммыта барыбыт санаатын өрө көтөхтө. «Сибиир күүһэ» магистральнай гаас турбатын үлэлэтии историяҕа сүҥкэн суолталаах түгэнинэн буолла.
Уһук Илиҥҥи региоҥҥа эдэр ыаллар дьиэнэн-уотунан хааччыллар кыһалҕаларын быһаарыыга биһиги өрөспүүбүлүкэбит киллэрбит көҕүлээһинин дойдубут аҕа баһылыга өйөөтө. Сахабыт сирин бүттүүнүгэр эдэр ыаллар бу өйөбүлүнэн хайыы-үйэ туһанар кыахтаннылар.
Хаарбах дьиэлэртэн көһөрүү киэҥ хабааннаахтык ыытыллар, өрөспүүбүлүкэ араас муннуктарыгар, ону тэҥэ Арктикаҕа эмиэ саҥа объектар – оҕо уһуйааннара, оскуолалар, култуура кииннэрэ, спорт саалалара үлэҕэ киирэллэр, суоллар, муосталар тутуллаллар!
Олохпут тупсан иһэрэ хас биирдии киһиэхэ биллэр уонна көстөр диэн бигэ эрэллээхпин.
Кэлэр 2020 сылы Саха сиригэр Аҕа дойдуга бэриниилээх буолуу сылынан биллэрдим. Улуу Кыайыы 75 сылыгар аҕа көлүөнэбит эйэлээх олох туругурарын туһугар оҥорбут хорсун быһыыларынан киэн туттан туран, төрөөбүт өрөспүүбүлүкэбит уонна улуу Россиябыт чэчирии сайдарыгар тус кылааппытын киллэрэргэ дьулуһуохтаахпыт. Дьиҥнээх патриотизм – бу бэйэҥ дьиэ кэргэҥҥэр, коллективкар уонна төрөөбүт дойдугар таптал уонна эппиэтинэһи сүгүү.
Күндү биир дойдулаахтарым! Саҥа дьыл үтүө дьыалаларынан баай буоллун, хас биирдиигитигэр үрдүккэ дабайыыга уҕараабат кыаҕы, элбэх үөрүүлээх түгэни бэлэхтээтин, сырдык санааларгыт туоллунар! Эһиэхэ чэгиэн доруобуйаны, этэҥҥэ буолууну, дьолу уонна ситиһиини баҕарабын!
Хас биирдии дьиэ кэргэҥҥэ таптал уонна өйдөһүү баар буоллун, хас биирдии киһи чугас дьонун өйөбүлүгэр уонна истиҥ сыһыаныгар куустардын! Саҥа дьыл дьикти дьоллоох түгэнэ бука барыбыт сүрэҕэр ил гыннын!
Саха Өрөспүүбүлүкэтин Ил Дархана Айсен Николаев
