16 От ыйа 16.07
  • 24°
  • $ 87,81
  • 95,78

Саҥа «Сахалыы таба суруйуу тылдьыта» таҕыста

09:54, 11 февраля 2016
Текст:
Читайте нас на
Яндекс Новости
ЯДВ

Төрөөбүт тыл уонна сурук-бичик күнүн көрсө эбиллэн, көннөрүллэн 32 тыһ. кэриҥэ тыллаах саҥа «Сахалыы таба суруйуу тылдьыта» Саха Өрөспүүбүлүкэтин бырабыыталыстыбатын уурааҕынан «Бичик» национальнай кинигэ кыһатыгар 4 тыһ. ахсаанынан бэчээттэнэн таҕыста.

Саҥа тылдьыт 2015 сыл ахсынньы 22 күнүгэр бигэргэммит таба суруйуу быраабылаларыгар олоҕуран бэлэмнэннэ, бу быраабылалар киниэхэ сыһыарыы быһыытынан киирдилэр.

Анатолий Нелунов, кылаабынай редактор, РНА СС Гуманитарнай чинчийии уонна хотугу аҕыйах ахсааннаах омуктар проблемаларын институтун ыстаарсай научнай үлэһитэ, филологическай наука кандидата:

— Саҥа тылдьыт сүрүн уратыта – икки быраабылалаах. Тылы таба суруйуу – орфографияны таһынан, сурук бэлиэтин сөптөөхтүк туруоруу – пунктуация эмиэ киирдэ. Ону таһынан, урут көппүт сахалыы тыллары булан киллэрдибит, ол оннугар нууччаттан тартарыылаах, нууччалыы сыһыарыылаах тыллары сахалыынан, сахатыйбытынан солбуйан көҕүрэттибит. Дьүһүннүүр уонна тыаһы үтүктэр тыллары, орфографияҕа бэриммэт буоланнар, холобур, киһи тыаһы-ууһу хайдах баҕар үтүктүөн сөп буоллаҕа дии, уопсай сүбэнэн тылдьыкка эмиэ киллэрбэтибит. Биир олохтоох тыллар эмиэ төрүт олохсуйбут формалара эрэ киирдэ. Онон, мэһэйдэри аҕыйатан, төрүт саха тылыгар ааны арыйдыбыт дии саныыбын. Тылдьыт наадыйар дьоҥҥо барытыгар тиийимтиэ буоллар диэн баҕа санаалаах, соруктаах үлэлээтибит.

Саҥа «Сахалыы таба суруйуу тылдьытын» олунньу 11 күнүттэн «Бичик» маҕаһыыннарыгар 350 солк. атыылаһыахха сөп. Кытаатан төрөөбүт тылбытынан таба суруйуохха.

Следите за самым важным и интересным в Telegram-канале и WhatsApp-группе ЯСИА