Россия президенэ Владимир Путин судаарыстыбаннай уонна муниципальнай медицина тэрилтэлэрин салайааччыларын уонна кини солбуйааччыларын дуоһунаһыгар үлэлээччилэр 65 саастарыгар диэри эрэ үлэлиэхтээхтэрин туһунан сокуоҥҥа илии баттаата. Бу туһунан РИА Сонуннар иһитиннэрдэ.
Докумуон официальнай порталга бэчээттэннэ.
Сокуоҥҥа олоҕуран, судаарыстыбаннай уонна муниципальнай медицина тэрилтэлэрин салайааччыларыгар уонна кини солбуйааччыларыгар дуоһунаска үлэлиир саастара 65 сааһынан хааччахтанар.
Үөһэ этиллибит дуоһунастарга үлэлээччилэр 65 саастарын туоллахтарына, кинилэр суругунан сөбүлэҥнэригэр олоҕуран, квалификацияларыгар сөп түбэһэр атын үлэҕэ көһөрүллэллэр.
Бу дуоһунастарга үлэлиир болдьох 70 сааска диэри уһатыллыан сөп, өскөтүн тэрилтэ үлэһиттэрин уопсай мунньаҕынан тэрийээччигэ туһааннаах сурук баар буоллаҕына.
Сокуон 2017 сыл алтынньы 1 күнүттэн олоххо киирэр.
