Өлүөхүмэ улууһун олохтооҕор Виктор Андреевич Софроновка Арассыыйа Федерациятын Бэрэсидьиэнин Ыйааҕынан Арассыыйа Дьоруойун аата иҥэрилиннэ. Бу туһунан Саха сирин баһылыга Айсен Николаев МАХ ханаалыгар иһитиннэрдэ.
Киниэхэ бу үрдүк судаарыстыбаннай наҕарааданы сэрии толоонугар көрдөрбүт ураты хорсунун, бэйэни харыстаммакка туруулаһыытын, бастыҥ байыаннай маастарыстыбатын уонна байыаннай андаҕарга бэриниилээҕин иһин анаатылар.
Виктор Софронов, анал байыаннай дьайыы саҕаланыаҕыттан, Саха сириттэн 13-c Арассыыйа Дьоруойунан буолла.
«Кини хорсун быһыыта — эрэллээх, тулуурдаах уонна байыаннай андаҕарга бэриниилээх буолуу холобура. Виктор Андреевиһы үрдүк судаарыстыбаннай наҕараадатынан ис сүрэхтэн эҕэрдэлиибит, кытаанах доруобуйаны, этэҥҥэ буолууну уонна сотору төрөөбүт дойдутугар эргиллэн кэлэрин баҕарабыт», — диэн Саха сирин баһылыга суруйда.
