Ааҕааччы киэҥ араҥатыгар анаммыт “Маҥнайгы хараҥаччылар” кытаанах тастаах дьоһун кинигэҕэ ахтыылар, ыстатыйалар киирбиттэр. Кинигэ сүрэхтэниитигэр кэргэнэ А.И. Аргунова, Хачыкаат нэһилиэгин баһылыга И.В. Оболкина, ССРС, РСФСР уонна САССР физкультураҕа уонна спорка туйгуна А.Е.Алексеев, СӨ нуучча дуобатыгар уон төгүллэээх чемпиона Н.Н.Саввинов, СӨ спорт бэтэрээннэрин сэбиэтин бэрэссэдээтэлэ, СӨ үтүөлээх тренерэ Г.Г. Сивцев, Игорь Андреевич бииргэ төрөөбүт убайа Николай Никифоров уонна да үгүс чугас дьоно-сэргэтэ, доҕотторо кытыннылар. Соторутааҕыта буолбут Спорт министиэристибэтин кэллиэгийэтин быһаарыытынан, сыллата 100 харахтаах дуобакка Игорь Андреевич Никифоров сырдык кэриэһигэр күрэхтэһии тэриллэр буолла.
Мин бу кинигэ ааптара, Игорь Андреевич огдообото Альбина Аргунованы кытта кэпсэттим.
— Игорь Андреевичтыын биһиги 34 сыл бииргэ олорбуппут. Игорь Игоревич диэн уоллаахпыт, сиэннээхпин. Күрэхтэһиилэргэ куруутун бииргэ сылдьар этибит. Мин ыал буоларбар Россияҕа икки төгүл үһүс миэстэлээх этим, эмиэ иккитэ Сэбиэскэй Сойуус финалыгар кыттыбытым. Оччолорго кини саҥа күрэхтэһэн эрэрэ. Сотору кэминэн дьоһун ситиһиилэрдэммитэ. Онтон тэрийэр үлэнэн күүскэ дьарыктаммыта. Сахабыт сиригэр маастар нуормалаах Бүтүн Сойуустааҕы турнирдары тэрийбитэ. Онон дуобат сайдыытыгар улахан өҥөлөөх. Ол түмүгэр билигин биһиги оҕолорбут Россияҕа, аан дойдуга 64 уонна 100 харахтаах дуобакка улахан ситиһиилээхтик оонньууллар. Онтон мин наһаа үөрэбин. Мин кини баарыгар наар бэлэмҥэ сылдьыбытым, күрэхтэһиигэ ханна тиийэрбин, түһэр сирбин, о.д.а. барытын быһаарар этэ. Наһаа үчүгэйдик олорбуппут. Бу кинигэни кэргэммэр анаан суруйдум, — диэтэ Альбина Иннокентьевна ол үтүөкэн кэмнэри бу баардык санаан.
Бу үтүө тэрээһиҥҥэ анаан сүүс харахтаах дуобакка күрэхтэһии тэрилиннэ, кылаабынай судьуйанан А.В.Павлов үлэлээтэ.
— Игорь Андреевичка анаммыт кинигэ сүрэхтэниитигэр сөп түбэһиннэрэн өрөспүүбүлүкэ таһымнаах күрэхтэһии буола турар. Барыта 69 дуобатчыт оонньуу сылдьар. Сахабыт сирин киин куоратыттан элбэх кыттааччы, ол иһигэр оҕо спортивнай оскуолатын иитиллээччилэрэ бааллар. Биир дойдулаахпыт, аан дойдутааҕы кылаастаах гроссмейстер Николай Гермогенов, 76 саастаах ССРС спордун маастара Николай Саввинов, ыраах Муома улууһуттан ССРС спордун маастара Иван Щукин, Мэҥэ Хаҥаластан биллиилээх маастар Василий Куприянов кэлэннэр оонньууну киэргэттилэр, — диэтэ Афанасий Васильевич.
Икки күннээх хатыһыылаах оонньууга үрдүкү лигаҕа эр дьоҥҥо — Николай Гермогенов, дьахталларга Евгения Иванова кыайыылаахтарынан буоллулар. Оттон улуус күрэхтэһиитигэр эр дьоҥҥо — Иван Павлов, дьахталларга — Евгения Иванова, оҕолорго – Айсен Егоров инники күөҥҥэ таҕыстылар.
