19 Тохсунньу 19.01
  • -48°
  • $ 73,82
  • 83,32

Орто Халыма Хатыҥнааҕар Хатыҥчаана олохсуйда

15:25, 19 октября 2016

Орто Халыма улууһун Хатыҥнаах нэһилиэгин оҕолоро бу күннэргэ куба оҕотун иитэр сүпсүлгэнигэр сылдьаллар. Бокуруоп таҥаратын күн соҕуруу көтөн иһэр куба үөрүттэн хаалан хаалбыт куба оҕотун тутан, оскуолаҕа аҕалан бүөбэйдииллэр. 


Оскуола дириэктэрэ Андрей Винокуров бу курдук кэпсиир: „Алтынньы 14 күнүгэр дэриэбинэ олохтооҕо үрдүнэн кубалар аймаммыттарын көрбүтэ. Үөртэн биир куба дэриэбинэ ортотунааҕы күөлгэ кэлэн түспүт. Ыта көтөр үрдүгэр түһэн истэҕинэ өрүһүйэн, оскуола учууталларыгар тыллаабыт. Хата, оскуола чугас буолан, онтон сүүрсэн тахсан кубаны дьиэҕэ киллэрбиппит. Оҕото эбит диэн быһаардыбыт. Дьиҥэр, туох да эчэйиитэ суох да буоллар, кыайан салгыы ыраах айаны тулуйуо суоҕа диэбиттэрэ буолуо, ити курдук үөр хаалларан кэбиспит. Кэлин биир соҕотох куба кэлэн күөлү хаста да эргийбитин олохтоохтор көрбүттэр этэ“.

111

Билигин көтөрү оскуола сылаас кыладыапкатыгар туталлар, 6-с кылаас оҕолоро бэйэ көрүүтүгэр ылан, күнү быһа аһаталлар, уулаталлар. Оҕолор кубаҕа Хатыҥчаана диэн ааты иҥэрбиттэр.

Тахсыбыт айылҕа дьиктитин туһунан тутатына улуустааҕы айылҕа харыстабылын инспекциятыгар биллэрбиттэр. Инспекция начаалынньыга Иван Белоногов: „Куба оҕотун иитэн эрэллэрин туһунан оскуолалар биллэрбиттэрэ, салгыы хайдах буолабыт диэн сүбэлэппиттэрэ. Маныаха Дьокуускайдааҕы „Орто Дойду“ зоопаркатын кытта кэпсэппиппит. Ол түмүгэр кубаны кинилэргэ ыытар туһунан түмүккэ кэллибит. Билигин нэһилиэккэ сырыы баар буолла эрэ, көтөр оҕотун улуус киинигэр ыыттарыахпыт уонна салгыы Дьокуускайдатыахпыт“, — диэтэ.

0
0
Тутаах тыллар
19 января 19.01
  • -48°
  • $ 73,82
  • 83,32