13 От ыйа 13.07
  • 18°
  • $ 87,74
  • 95,76

Ньурбалар ойуурга баһаартан сэрэхтээх буолуу сезонун саҕалаатылар

Читайте нас на
Яндекс Новости
ЯДВ

Ньурба улууһугар ыам ыйын 18 күнүттэн ойуурга баһаартан сэрэхтээх буолуу сезона саҕаланна. Итинэн сибээстээн Ньурбатааҕы лесничэй солбуйааччыта Леонид Хохсоторовы көрсөн кэпсэттибит.


— Леонид Петрович, улууска баһаартан сэрэхтээх буолуу сезонун төһө бэлэмнээх көрсөбүтүй?

— Борокуратуура ирдэбилинэн муус устар ыйтан олохтоох дьаһалталар, «Якутлесресурс» ГАУ Ньурбатааҕы филиалын уонна «Авиалесохрана» отделениетын бэрэбиэркэлээбиппит. Баһаары умуруорарга төһө бэлэмнээхтэрэ бэрэбиэркэлэммитэ — үп-харчы көрүллүүтэ, төһө киһи, тиэхиньикэ, инвентар, уматык, ас-үөл баара. «Якутлесресурс» ГАУ Ньурбатааҕы филиала уонна «Авиалесохрана» отделениета сүнньүнэн бэлэмнээхтэр диэн быһаарбыппыт, кыра итэҕэстэри туоратарга сүбэлэри биэрбиппит. Бу туолла. «Якутлесресурс» филиалын баһаарынай-химическэй ыстаансыйата сезоннай үлэҕэ 8 киһини үлэҕэ ылла, биир ДТ-75 тыраахтыр кэллэ. Суол аһылыннаҕына траллаах «Камаз» кэлэрэ күүтүллэр. Бу икки тэрилтэҕэ аны эбии инвентардара кэлиэхтээх — аналлаах көстүүмнэр, РЛО («ранцевый лесной опрыскиватель») сапчаастара.

— Биирдиилээн нэһилиэктэр бэлэмнэрэ?

— Нэһилиэктэр дьаһалталара үксэ бэлэмнэр, астарын-үөллэрин быһаарыннылар, тиэхиньикэлэрин көрүнэн өрөмүөннэннилэр. Сүрүн кыһалҕалара — РЛО-ларын саппаас чаастара эргэрдилэр, ону саҥардалларыгар үп-харчы көрүннүлэр.
Ньурба улууһугар ойуур баһаардарын умуруоруу былаана 2019 с. ахсынньытыгар оҥоһуллан, тохсунньуга СӨ Экология, айылҕаны туһаныы уонна ойуур хаһаайыстыбатын министиэристибэтинэн бигэргэтиллибитэ. Баһаар сэрэхтээх буолуу сезона аһыллыан иннинэ, борокуратуура, атын да хонтуруоллуур уорганнар кыттыылаах үгэс буолбут сүбэ мунньахпыт ыытыллыбыта. Дьаһалталар ойуурга баһаартан сэрэхтээх буолуу сезонугар бэлэмнээх буолууларын ирдээн туран, борокуратуура барыбытыгар сорудахтары тиэрдибитэ. Өрөспүүбүлүкэ өттүттэн эмиэ күннэтэ күүстээх ирдэбил турар.

— Ыам ыйын 18 күнүгэр ойуур баһаарыттан сэрэхтээх буолуу сезона аһылынна диэн официальнайдык биллэрэбит?

— Дьону кытта көрсүһүүлэргэ да, суругунан да өртөөһүн уонна мутугу уматыы бобуллан турар диэн мэлдьи этэбит-сэрэтэбит. Дьону кытта маастардарбыт эмиэ өйдөтүү үлэтин ыыталлар. Ол үрдүнэн маннык кэһиилэр син-биир тахса тураллар. Ходуһаларын өртөөбүттэрэ син-биир ойуурга киирэн ойууру сиир. Ыам ыйын 16 к. Дьиикимдэ сиригэр итинник умайыы тахса сырытта, Дьиикимдэ уонна Антоновка баһаарынай дружиналарынан умуруоруллубута. Лесничество, «Якутлесресурс» ГАУ уонна ОНД үлэһиттэрэ туохтан умайыы тахсыбытын бэрэбиэркэлээбиттэрэ. Баһаартан сэрэхтээх буолуу сезона саҕаланыан иннинэ «Якутлесресурс» ГАУ үлэһиттэрэ тахсан үлэлиир кыахтара суох, тоҕо диэтэххэ, бу түгэҥҥэ харчы төлөммөт. Кинилэр баһаартан сэрэхтээх буолуу сезона аһыллыбытын кэннэ баһаары умуруора тахсаллар.

— Дьон билигин ордук туохха болҕомтолоох буолуон нааданый?

— Сэтиэнэҕи, мутугу уматыы, кутааны оттуу кыккыраччы бобулларын туһунан санатыахпын баҕарабын. Маны кэспит буруйдаах дьон РФ КоАП 8.32 ыстатыйатынан («Ойуурга баһаартан куттал суох буолуутун быраабылаларын кэһии») административнай эппиэтинэскэ тардыллыахтарын сөп. Баһаар буолбутун көрдүгүт даҕаны тутатына 112, 2-32-56 уонна 2-22-01 төлөпүөнүнэн эрийэн этэргитигэр көрдөһөбүн. Бу сайыммыт улахан кураан уонна итии буоларын билгэлииллэр. Онон бука бары тыаҕа-ойуурга сылдьан баһаартан сэрэхтээх буолуу быраабылаларын халбаҥнаабакка тутуһуохпутун уонна уоттан муҥутуур сэрэхтээх буолуохпутун наада.

Следите за самым важным и интересным в Telegram-канале и WhatsApp-группе ЯСИА