Быйыл Ньурба көрдүүр-быыһыыр этэрээтин базатыгар водолазнай ыстаансыйаны арыйар былааннаахтар. Бүгүҥҥү күҥҥэ исписэлиистэр наадалаах үөрэхтэрин түмүктээтилэр, диэн Саха сирин быыһыыр сулууспата иһитиннэрдэ.
Ыстаансыйаны тэрийии үлэтэ региоҥҥа водолазнай үлэ географиятын кэҥэтэргэ былырыыҥҥыттан ыытыллар.
эҕэһээ, ыам ыйын 5 күнүгэр Арассыыйаҕа водолаз күнэ бэлиэтэнэр. Бырааһынньык 2002 сыллаахха олохтоммута, оттон дата мээнэҕэ талыллыбатаҕа: чуолаан ыам ыйын 5 күнүгэр 1882 сыллаахха Император Александр III Кронштадка Аан дойдуга бастакы водолазнай оскуоланы олохтуур туһунан ыйаахха илии баттаабыта.
Саха сирин быыһыыр сулууспатын водолазнай подразделениета өрөспүүбүлүкэҕэ уу аннынааҕы үлэ толору спектрын толорор кыахтаах соҕотох структура буолар.
“Билигин биһиэхэ 12 үрдүк таһымнаах исписэлиис үлэлиир, кинилэр төһө да штатнай оборудованиены, тэрили саҥардыыга сыһыаннаах ыарахаттар баалларын иһин, сүрүннээн эбээһинэстэрин 100% толороллор», — диэн Саха сирин быыһыыр сулууспатын начаалынньыга Иннокентий Андросов бэлиэтээтэ.
Водолазтары профессиональнай бырааһынньыктарынан Саха сиринээҕи ЫБММ ГУ-тан бочуотунай грамоталарынан наҕараадалаатылар.
