Бүлүү куоратыгар ыам ыйын 6 күнүгэр Улуу Кыайыы 81 сылын бэлиэтиир «Өйдүүбүт, сүгүрүйэбит, киэҥ туттабыт!» тэрээһин чэрчитинэн Советскай Союз Геройа Николай Алексеевич Кондаков кэргэнэ, биллиилээх суруналыыс Нина Иннокентьевна Протопопова искибиэригэр мустубут Бүлүү эдэр ыччата, дьоно-сэргэтэ сүдү киһиэхэ аналлаах пааматынньыкка элбэх тыыннаах сибэкки уурдулар.
Миитиҥҥэ улуус баһылыгын социальнай эйгэҕэ солбуйааччы Александр Комаров, Чернышевскай нэһилиэгин баһылыга Антон Амбросьев, Чинэкэ олохтооҕо, бэтэрээн Константин Корякин, үөрэҕирии үтүөлээх үлэһитэ, бэтэрээн Ия Протопопова, Бүлүү куорат депутаттарын Сэбиэтин бэрэссэдээтэлэ, И.М.Гоголев-Кындыл аатынан улуустааҕы бибилэтиэкэ дириэктэрэ Николай Харлампьев уо.д.а. Нина Иннокентьевнаны үтүө тылларынан ахтан-санаан аастылар, эһиил төрөөбүтэ 100 сыла киэҥник бэлиэтэниэҕин аҕыннылар.
Николай Харлампьев «Бэлэм буол» 1990 сыллааҕы хаһыаттан Нина Иннокентьевна Улуу Кыайыы туһунан суруйуутун ааҕан иһитиннэрэн сэргэхситтэ.
Бүлүү Уоттутуттан төрүттээх Нина Иннокентьевна Протопопова биллиилээх уопсастыбаннай диэйэтэл, суруналыыстыкаҕа Саха Өрөспүүбүлүкэтин Судаарыстыбаннай Бириэмийэтин лауреата, «Бочуот Знага» уонна «Норуоттар доҕордоһуулара» уордьаннар кавалердара, Арассыыйа, Саха Өрөспүүбүлүкэтин култууратын үтүөлээх үлэһитэ, Саха Өрөспүүбүлүкэтин, Бүлүү улууһун Бочуоттаах олохтооҕо этэ.
Кини 50 тахса сыл устата «Бэлэм буол», «Кэскил» оҕо хаһыаттарын редактордарынан үлэлээбитэ, 20 тахса кинигэ ааптарынан буолар.
Тыыл бэтэрээнэ, Советскай Союз Геройа Николай Алексеевич Кондаков кэргэнэ Нина Иннокентьевна Протопопова ыскамыайкаҕа олорор пааматынньыгын скульптор Николай Чоччасов оҥорбута, искибиэр 2020 сыллаахха арыллыбыта. Нина Иннокентьевна Протопопова. «Өйдүүбүт, сүгүрүйэбит, киэҥ туттабыт!»
Ааптар: Николай Куприянов, «Олох суола».
