Үгүс дьиэлээх киһиэхэ, ыалга күһүн оттук сезона саҕаланнаҕына, саамай күүтүүлээх күннэр үүммүттэринэн биллэр. Сыл аайы буоларын курдук, олорор уонна үлэлиир дьиэлэрбитигэр хаһан ититии холбонуохтааҕар интэриэһиргиир ыйытыыларбыт үксүүр.
Ленскэй нэһилиэк баһылыга 2022-23 сс. оттук кэмэ тохтуоҕуттан, бэс ыйын 5 күнүгэр 413-р нүөмэрдээх “2023-24 сс. оттук сезонун үлэтин хонтуруоллуур (сааскы-сайыҥҥы кэм) хамыыһыйаны тэрийии” уонна от ыйын 28 күнүгэр 544-р нүөмэрдээх “2023-24 сс. оттук сезонун үлэтин хонтуруоллуур хамыыһыйаны тэрийии” Дьаһаллары таһаарбыта.
Ленскэй нэһилиэк олохтоох дьаһалтатын специалиһа Василий Сыроватскай иһитиннэрэринэн, атырдьах ыйын 9 күнүттэн тэрилтэ, элбэх квартиралаах дьиэлэр ититиигэ холбонууларын бэлэмин бэрэбиэркэлиир үлэлэр саҕаламмыттара.
“Эрэл” ХЭТ тэрилтэ көрүүтүгэр-истиитигэр киирэр элбэх квартиралаах дьиэлэргэ (Ленин, Цугель-Аммосова, М. Аммосов, Ойуунускай аат., Октябрьскай, Чернышевскай, Кооператив, Строительнай, Советскай, Ржевскай уулуссалар) ититии ис систематын ыраастааһын үлэлэрин атырдьах ыйыттан саҕалаабыта этиллэр. Ол курдук, бүгүҥҥү күҥҥэ тэрилтэ 30 дьиэни ыраастаабыт. “Эрэл” ХЭТ хааччыйар дьиэлэриттэн билигин 27 элбэх квартиралаах дьиэ ыраастанара хаалла. Оттон Намнааҕы “Намкоммутеплоэнерго” тэрилтэҕэ 5 дьиэ (Чернышевскай, Октябрьскай, М. Аммосов, И. Винокуров аат. уулуссалар) киирэриттэн барытыгар туһааннаах үлэ ыытыллан турар.
Социальнай суолталаах объектар оттук сезонугар киирэргэ бары өттүнэн бэлэм олороллор: уһуйааннар – “Сулусчаан”, “Солнышко”, “Кыталык”, “Кустук”, “Көлүкэчээн”, “Туллукчаан”, “Чэчир”, “Кэнчээри”, “Кэскил”; үөрэх дьиэлэрэ – Намнааҕы педагогическай колледж, Намнааҕы бастакы, иккис нүөмэрдээх оскуолалар, улуустааҕы гимназия, Намнааҕы Оҕо искусствотын оскуолата, Намнааҕы Оҕо спортивнай оскуолата; Намнааҕы суут дьиэтэ уонна Намнааҕы киин балыыһа.
Харысхан Попов, Эҥсиэли
