28 Кулун тутар 28.03
  • -12°
  • $ 92,59
  • 100,27

Муомаҕа Суон Тиит учаастагар саҥа хочуолунайы Ил Дархан арыйда

Читайте нас на
Яндекс Новости
ЯДВ

Муома оройуонугар коммунальнай хаһаайыстыба салаатыгар убаҕас оттукка көһөрүү чэрчитинэн нэһилиэктэргэ саҥа хочуолунайдар тутуллаллар. Алтынньы 16 күнүгэр Сун-Тиит учаастакка өссө биир сылааһы биэрэр эбийиэк арыллыытыгар Ил Дархан Айсен Николаев кыттыыны ылла.


Хонуу сэлиэнньэтиттэн 12 км тэйиччи сытар Суон-Тиит учаастагар 2,4 МГВт кыамталаах инчэҕэйэ ньиэбинэн оттуллар Муома оройуонугар алтыс саҥа хочуолунай арыллыытын сиэрэ-туома үөрүүлээх быһыыга-майгыга ыытылынна.

Олохтоохторго бэлиэ түгэҥҥэ Саха Өрөспүбүлүкэтин баһылыга Айсен Николаев кыттыыны ылбыта икки бүк кэрэхсэбиллээх буолла. “Биһиги бүгүн Арктика улуустарыгар сүрүн болҕомтобутун уурар кэммит кэллэ. Уустук усулуобуйалаах, тыйыс айылҕалаах сиргэ-уокка дойдуларыгар чахчы бэриниилээх, туохтан да толлубут, хорсун санаалаах дьон-сэргэ үлэлии-хамсыы сылдьар. Урукку өттүгэр Арктикаҕа сыһыаннааҕы элбэҕи этэр этибит, ол гынан оҥоһуллара аҕыйаҕа. Бүгүн элбэҕи этиэххэ, оҥоһулларын-тутулларын өссө элбэтиэххэ. Арктика суолтатын өрө тутан, өрөспүүблүкэ эрэ буолбакка, бүтүн Арассыыйа киэн туттар сирэ буоларын курдук күүскэ үлэлиэхтээхпит, кыһаллыахтаахпыт. Муома оройоунун бары олохтоохторун үөрүүлээх күнүнэн эҕэрдэлиибин, үлэҕитигэр өссө да үрдүк чыпчааллары, өрөспүүбүлүкэ  өттүттэн куруук өйөбүлбүтүн тиэрдэ туруохпут”, – диэн кини этиитин, нэһилиэнньэ уруйдаата.

Оройуон баһылыга Иван Павлов СӨ баһылыгар, бырабыыталыстыбаҕа уонна өрөспүүбүлүкэ олох-дьаһах коммунальнай хаһаайыстыбатын салалтатыгар истиҥ махтал тыллары эттэ. “Маннык улахан кыамталаах хочуолунай кыра учаастакка кэнэҕэскитин саҥа дьиэлэр тутууларыгар төһүү күүс буолара саарбахтаммат. Эһиил ыраах Төбүлэх нэһилиэгэр саҥа хочуолунай киириэҕэ. Дьон олорор усулуобуйатын хаачыстыбатын тупсарыыга үлэ салҕанар”, — диэтэ кини.

Суон Тиит олохтоохторун ааттарыттан Анна Афанасьевна Хабарова махтал тыллары эттэ.

Бу күн Айсен Сергеевич оройуоннааҕы балыыһаҕа, нефтебазаҕа, суол тутуутун үлэһиттэригэр, Муома орто оскуолатыгар сырытта. Ону сэргэ  97 саастаах сэрии бэтэрээнигэр И.А. Петровка уонна элбэх оҕолоох Саргылана, Владимир Корякиннарга ыалдьыттаата.

Ааптар: М. Старкова, «Индигир уоттара» хаһыат, Муома улууһа

Следите за самым важным и интересным в Telegram-канале и WhatsApp-группе ЯСИА