2026-2027 үөрэх дьылыгар М.К. Аммосов аатынан Хотугулуу-Илиҥҥи федеральнай университекка педагогическай үөрэххэ 959 миэстэ көрүллүбүт, ол иһигэр 105 тус сыаллаах үөрэтии.
Университекка тус сыаллаах дуогабарынан үөрэххэ киирэр абитуриеннарга онлайн сиэрбис, тус сыаллаах үөрэх навигатора аһылынна. ХИФУ Тутар хамыыһыйата иһитиннэрбитинэн, навигатор тус сыаллаах үөрэҕи, сакаасчыты талан ылан, сайаапканы толорорго көмөлөһөр.
Тус сыаллаах үөрэх диэн абитуриент университекка киирэн баран үлэлии барар тэрилтэтин кытта дуогабар түһэрсэр. Бу дуогабар быһыытынан устудьуон босхо үөрэнэр, истипиэндьийэни ылар, ону таһынан, үлэ биэрээччиттэн кэккэ көмөнү ылыан сөп, холобур, айан ороскуотун төлөттөрүөн, дьиэ булан биэриэхтэрин, аһылыгын төлүөхтэрин син.
Дуогабарынан үөрэххэ киирбит устудьуоннар быраактыкаларын үлэлии барар сирдэригэр бараллар, ол тэрилтэҕэ сыһыарыллаллар. Абитуриеннар туһунан куонкурустаһаллар, онон үөрэххэ киирэр кыахтара үрдүүр. Үөрэнэ сылдьан устудьуон үлэлии барыахтаах тэрилтэтигэр харчыга үлэни толорон, эбии дохуот оҥостуон сөп. Оттон үөрэҕин бүтэрдэҕинэ сакаасчыт үлэ миэстэтинэн хааччыйар.
2026-2027 үөрэх дьылыгар ХИФУ-га бакалавриат уонна специалитет бырагырааматынан 351 тус сыаллаах миэстэ көрүлүннэ. Онтон 340 күнүскү үөрэххэ уонна 11 кэтэхтэн бэрилиннэ. Магистратура бырагырааматынан күнүскү үөрэххэ 3 миэстэ баар, ординатураҕа күнүскү үөрэххэ 101 миэстэ, суруйда Саха парламент саайт.
