19 От ыйа 19.07
  • 21°
  • $ 87,88
  • 96,1

Кирилл Алексеев: "Якутия" уонна "Саха сирэ" хаһыаттар өссө ордук тиийимтиэ буолуохтара

18:03, 04 июля 2017
Текст:
Читайте нас на
Яндекс Новости
ЯДВ

«Сахамедиа» холдинг 2017 сыл иккис аҥарыттан судаарыстыбаннай босхо хаһыаттары аадырыһа суох тарҕатыыга көһөрүө. Онон ким баҕалаах сөбүлүүр хаһыатын анал уурар сирдэртэн уонна тарҕатар туочукалартан ылар кыахтаныа. Билигин «Якутия» уонна «Саха сирэ» хаһыаттар холбоон 85 тыһыынча экземплярынан таһаарыллаллар. 


2016 сыл күһүнүгэр Егор Борисов өрөспүүбүлүкэ судаарыстыбаннай хаһыаттара босхо тарҕаныахтаахтар диэн эппитэ. Хаһыат таһаарыыта бюджеттан үбүлэнэр буоллаҕына, нэһилиэнньэ хаһыат иһин икки бүк төлүө суохтааҕын быһаарбыта. Хас да ый бу быһаарыыны араас араҥаҕа сытыытык ырыппыттара.

Онон Ил Дархан көҕүлээһинэ  уопсастыба уонна идэлээх дьон күүстээх экспертизаларын ааспыта. Ити эрээри бүтэһик тылы ааҕааччы ылбыта.

2017 сыл бастакы аҥарыгар «Якутия» уонна «Саха сирэ» хаһыаттарга босхо сурутуу хампаанньата саҕаламмытыгар, тыһыынчанан дьон бэйэтин почталарын дьааһыктарыгар ыларга сайаапка түһэрбитэ. Дьон саҥаны киллэриини ылыныытын өйдүүргэ бу хамсааһын наһаа наадалаах этэ.

Онон сонун дьаһал ааҕааччы билиниитин ылынан, тираж биллэрдик үрдээн барбыта. Өрөспүүбүлүкэтээҕи хаһыаттар саҥа тыыннаммыттара. Пресса дойду үрдүнэн кириисискэ киирэр кэмигэр, «Якутия» уонна «Саха сирэ» хаһыаттар рекорд олохтообуттара, чахчы норуот хаһыата буолалларын бигэргэппиттэрэ.

Билигин, босхо хаһыаты ылыан баҕарааччы ахсаана эбиллэ турар. Хас биирдиилэрэ почталарын дьааһыктарыгар тиийиэн баҕарар. Ити эрээри, «Сахамедиа» төһө да нэһилиэнньэ иннигэр социальнай эппиэтинэстээҕин өйдөөбүтүн иһин, бюджет харчыта баҕа санааны барытын толорор кыаҕа суох.

Ол иһин холдинг «Якутия» уонна «Саха сирэ» хаһыаттары аадырыһа суох тарҕатыыны киллэрэргэ быһаарда. Ол эбэтэр дьон чугастааҕы анал тарҕатар сирдэртэн бэйэтэ холкутун кэлэн хаһыатын ылар кыахтанар.

Ити эрээри социальнай хайысхалаах кииннэр олохтоохторугар аадырыстаах тириэрдии оннунан хаалыаҕа. Кинилэри сэргэ Арктика олохтоохторугар маннык быһаарыы эмиэ баар буолуоҕа.

Хаһыаттар элбэх ахсаанынан тарҕаннахтарына, дьон информацияны көҥүл ылыытыгар тэҥ сыһыан олохтонуо.

Бүгүн Саха сирин хас үһүс олохтооҕо «Сахамедиа» холдинг таһаарыыларын кытта алтыһар. Биһиги манан тохтоон хаалыа суохтаахпыт. Биһиги сорукпут — судаарыстыбаннай СМИ-ни хас биирдии киһиэхэ тиийимтиэ оҥоруу. Онно туох баар сыраны ууруохтаахпыт. «Якутия» уонна «Саха сирэ» норуот хаһыаттара биһиги өрөспүүбүлүкэбит киэн туттуутунан буолуохтаахтар.

 Кирилл Алексеев, «Сахамедиа» холдинг генеральнай дириэктэрэ

Следите за самым важным и интересным в Telegram-канале и WhatsApp-группе ЯСИА