Күндээдэ нэһилиэгин Сэбиэтин депутат дьахталлара Ийэ сыла үүммүт бэлиэтигэр Герой-Ийэ Иванова Зинаида Михайловнаҕа ыалдьыттаатылар. Истиң эҕэрдэ, баҕа санаа тиэрдилиннэ.
2022 сыл өрөспүүбүлүкэҕэ Ийэ сылынан биллэрилиннэ. Сыл бастакы күнүгэр Ньурба улууһун Күндээдэтигэр олорор саамай кырдьаҕас ийэ Иванова Зинаида Михайловнаҕа олохтоох дьахталлар Сэбиэттэрэ эҕэрдэлэрин тириэртилэр.
Зинаида Михайловна 1932 сыллаахха III Бордоҥ нэһилиэгин Ойбон алааһыгар төрөөбүт. Ыал улахан оҕото буолан, аҕалара олохтон туоруоҕуттан, ийэтигэр көмө киһитэ буолан, сэттэ сааһыттан үлэҕэ эриллэн улааппыт. 14 сааһыттан фермаҕа үүт ыамын суруйар табельщик эппиэтинэстээх «дуоһунаһын» сүгэн, салгыы ыанньыксыттаан, хара сарсыардаттан, хара киэһэҕэ дылы үлэлиирэ. Ыанньыксыттаан 1982 сыллаахха «Ньурба» сопхуос Ньурбачааннааҕы отделениетыгар үлэлии сылдьан бочуоттаах сынньалаҥҥа тахсыбыт.
20 сааһыгар олоҕун аргыһын Алексей Данилович Иванову көрсөн ыал буолар. Кэргэнэ бэрт көнө, үтүө майгылаах, хоһуун үлэһит, мас ууһа буолан, Зинаида дьылҕатыгар улахан махталлаах. Саха сиэринэн унаар күөх торҕо буруону унаарыппыттарын аатыгар 11 оҕону күн сирин көрдөрбүттэр. Онон Зинаида Михайловна бүгүн түөрт уонтан тахса сиэн, отуттан тахса хос сиэн оҕолорунан олоҕо киэркэйэр. «Улахан оҕом алта уон алтата, кырам түөрт уон түөрдэ, дьиҥэ, оҕонньор буоллаҕа улахан оҕом, ону мин билигин да тоойуом диибин«, — диир Дьоруой-ийэ.
«Ыал — ийэтинэн» диэн өбүгэбит бэргэн этиитэ баар. Бу өйдөбүл күн бүгүн XXI үйэҕэ да суолталааҕын Ил Дархаммыт Айсен Сергеевич Николаев: «Ыал ийэтэ ситиһиилээх буоллаҕына, оҕолоро эмиэ ситиһиилээх, ыал олоҕо уйгулаах буолар», — диэн бэлиэтээбитэ көрдөрөр.
Ааптар: Венера Степанова, Ньурба улууһа
