Ил Дархан Айсен Николаев Ленскэйдээҕи холбоһуктаах өрүс пароходствотын генеральнай дириэктэрэ Сергей Ларионовтыын көрүстэ. Өрүттэр быйылгы навигация боппуруостарын кэпсэттилэр. Тэрилтэ быйыл 306 уу тырааныспарын үлэтин хааччыйыахтаах.
Жатайдааҕы суудуналары өрөмүөннүүр собуот 55 флоту бэлэмнээн туттарда.
Муус устар 1 күнүттэн механизмнары, массыыналары, Эдьигээн бөһүөлэгэр тохтоон турар «Софрон Данилов» буксирдаах теплоход араас техническай систиэмэтин бэрэбиэркэлиир, ыраастыыр үлэлэр саҕаланнылар.
Муус устар 10 күнүттэн «Капитан Бурковский», «Механик Курчатов» уонна «Механик Винокуров» буксирдаах теплоходтарга үлэ барыаҕа. Бу суудуналар Саха сиригэр 2024 сыл навигациятын арыйыахтара.
